یەک ژ کەسایەتیێن گرنگ یێن یه‌نه‌كێ مه‌لا به‌ختیار دیار کر، تێكۆشینا ژنێن كوردستانێ ل گه‌ل په‌كه‌كێ ده‌ست پێ نه‌كریه و ئه‌وێن كو دبێژن به‌لێ ل گه‌ل په‌كه‌كێ دەستپێ کرییە ئه‌و یێ نه‌حه‌قیه‌كێ و حه‌قاره‌تێ ل هەموو تەڤگەرێن کوردی و ژنێن کورد دکەن.
ئەندامێ بەرێ یێ مەجلیسا بلند یا یەکیتیا نیشتیمانی مه‌لا به‌ختیار د کۆنفەرانسا ناڤنەتەوەیی یا پلاتفۆرما دابیران یا ل سلێمانیێ پێک هاتی دا ئاخڤی.
مه‌لا به‌ختیار ل وێرێ پێشکێشیەک کر و پشترە بەرسڤا پرسان دا. مه‌لا به‌ختیار ل سەر پرسا بەشداربوویان یا ده‌ربارێ ژنێن کورد و یه‌په‌گێ بەرسڤ دا و گۆت: «هوون دفکرن کو ژنێن کورد ل گه‌ل په‌كه‌كێ هاتنه د قادا سیاسەتێ دا» ئەڤه یه‌ك قه‌ت ووسا نینه و نه‌راسته.
مه‌لا به‌ختیار تێکلداری مژارێ وها ئاخڤی: «یا ئێكێ ئەم دێ د ڤێ مژارێ دا پشتراست بین و ئەم دیرۆکێ بەروڤاژی ناكه‌ین. چوونا ژنا کورد یا د ناڤا سیاسەتێ و راکرنا چەکی دا مێژوویەکا گەلەک کەڤن هه‌یه. لێ ئاڤاکرنا هێزەکا نیزامی یا ژنان و ژن ژی خوە وه‌ك مێران وەکو پێشمەرگە برێڤە ببه‌ن، ڤەدگەریته سالێن 1970یێ. کۆمه‌لێ د سالا 1974ێ دا یه‌كینه‌یێن ژنان ئاڤا کرن. په‌كه‌كە د سالا 1984ێ دا دەست ب شەرێ چەکداری کر. نها گەر هوون رابن و ببێژن په‌كه‌كێ چەک دایە دەستێ ژنان ئەڤه نه‌مومكینه. دڤێت ئەم دیرۆکێ راست فێم بکه‌ین و رێزێ لێ بگرین».
مه‌لا به‌ختیار ئاخفتنا خوە وها دۆماند: «پارتیێن رۆژهلات د وارێ تەڤلیبوونا ژنان دا هەرده‌م ل پێشن. پرسگرێکا ژنێ ژ نێزیك ڤە ب ژیانا ئابووری ڤە گرێدایی یە. دەما کو کاپیتالیزم زوو هاتیه ئیرانێ، ژن زووتر کەتنه د ناڤا ژیانا ئابووری و پەروەردەیی دا. هەتا وی دەمی ئیراق و ترکیە ژی د ڤی واری دا ل په‌ی ئیرانێ بوون. بێ گوومان ڤێ كارتێكرنا خوە ل ژنێن رۆژهلاتێ کوردستانێ کر و ئەو زووتر تەڤلی خەباتێن سیاسی، لەشکەری و جڤاکی بوون. ژ خوە وەلاتپارێزیه‌کا دیرۆکی ل وێ هەرێمێ هەبوو. کۆمه‌لێ و په‌ده‌كێ د سالێن 1970یێ دا ژنا کورد تەڤلی رەفێن خوە دکرن. هوون نه‌شێن ڤێ پێڤاژۆیا مێژوویی بۆ په‌كه‌كێ حساب بكه‌ن و ب وێ بده‌نه دەستپێکرن، ئەڤه نەحەقی و بەروڤاژیکرنا دیرۆکا ژنا کوردە».
په‌كه‌كه د دیرۆکا خوە دا ئیدیعا دکەت کو هەم دیرۆکا کوردستانێ و هەم ژی دیرۆکا ژنێن کورد ل گه‌ل وان دەست پێ کرییە. دیرۆکا کوردان بەروڤاژی دکەت، ب تایبەتی د ناڤا گەلێ باکورێ کوردستانێ دا په‌كه‌كە ب زانەبوون تێگهشتنەکا «کوردایەتی بەریا په‌كه‌كێ نەبوو- مربوو، مە کوردایەتی ژ نوو ئافراند» به‌لاڤه‌دكر.
