دادگەها کەرەجێ یا ئیرانێ گرتیێ کوردێ یێ ب ناڤێ خەسرەو باشەرەت ل گرتیگەها قزلهیسارێ ئیدام کر.
رێخستنا مافێن مرۆڤان یا هەنگاوێ د راپۆرەکێ دە ئەشکەرە کر کو گرتیێ ب ناڤێ خەسرەو باشەرەتێ خەلکێ مەهابادێ ئیرۆ دانێ سبەهێ ژ ئالیێ دادگەها کەرەجێ یا ئیرانێ ل گرتیگەها قزلهیسارێ هات ئیدامکرن.
خەسرەو بەشارەت، ژ 2009ان ڤە د گرتیگەهێ دە بوو سالا 2016ان تەڤی 5 کەسان ب هنجەتا «ئەندامتیا رێخستنەکە سەلەفی و دژبەریا دەستهلاتا نەتەوەیی یا ئیرانێ» جەزایێ ئیدامێ ل وان هات برین.
هەروها هەنگاوێ راگهاند کو هەتا نها جەنازایێ خەسرەو باشەرەت رادەستی مالباتا وی نەهاتیە کرن.
د چەند مەهێن بۆری ژی دە هەر 5 گرتیێن دن هاتبوون ئیدامکرن. یەک ژ وان ژی ئەنوەر خزری بوو کو 1ێ گولانێ هاتبوو ئیدامکرن.
گرتیێن دنێن ب ناڤێن ئەیوب کەریمی، داوود ئەبدولاهی، قاسم ئابستە و فەرهاد سەلیم ژی بەریا ب چەند مەهان هاتبوون ئیدامکرن.
