دادگەها ئەنقەرەیێ ئیرۆ (پێنجشەم، 16/05/2024) سەرۆکێ شارەداریا مێردینێ ئه‌حمه‌د تورک ل سەر دۆزا کۆبانیێ ب دەهـ سالێن زیندانکرنێ سزا دا.
د دۆزا کۆبانیێ دە 108 کەس تێن دارزاندن، د ناڤ وان دە هەڤسەرۆکێن بەرێ یێن هه‌ده‌پێ سه‌لاحه‌ددین دەمیرتاش و فیگەن یوکسەکداغ ژی هەنە.
هەر د ڤێ چارچۆڤێ دە، 19 سالان جەزایێ گرتیگەهێ ل هەڤسەرۆکا بەرێ یا هه‌ده‌پێ فیگەن یوکسەکداغ هاتە برین.
پارلامەنتەرێ بەرێ یێ هه‌ده‌پێ ئالتان تان و شارەدارێ قەرسێ یێ بەرێ ئایهان بیلگەن ژی بێ تاوان هاتن زانین و هاتن بەردان.
د هلبژارتنێن داوی یێن شارەداریێن ترکیە و باکورێ کوردستانێ دە، ئه‌حمه‌د تورک کو نامزەدێ دەم پارتیێ بوو، پرانیا دەنگان بدەست خستبوو و بووبوو شارەدارێ مێردینێ.
هەروها ئه‌حمه‌د تورک د هلبژارتنێن 2014 و 2019ان دە ژ بۆ شارەداریا مێردینێ هاتبوو هلبژارتن، لێ هەر دو جاران ژی قەیووم هاتبوو دوورخستن و قەیووم ل شوونێ هاتبوو دانین.
ئه‌حمه‌د تورک سالا 1942ان ل باژارێ مێردینێ ژداییک بوویە. ژ سالا 1973ان هەتا 2011ێ، 6 جاران بوویە ئەندامێ پارلەمەنتۆیا ترکیەیێ و زێدەتری 3 سالان ب تاوانا پرۆپاگاندایا په‌كه‌كێ د گرتیگەهێ دە مابوو.
ئه‌حمه‌د تورک د سالا 1990ی دە پارتیا کەدێ یا گەل (هەپ) دامەزراند و ئەندامێ دامەزرینەرێ پارتیا جڤاکا دەمۆکراتیک (دتپ)، تەڤگەرا جڤاکا دەمۆکراتیک (دهپ)، پارتیا دەمۆکراتیک (دهپ)، پارتیا دەمۆکراتیکا گەلان (هه‌ده‌پ) یە.
