وەزیرێ کارێن دەرڤەیێ ترکیەیێ هاکان فیدان گۆت کو په‌كه‌كه باندۆرێ ل سلێمانیێ دکە و ترکیە دخوازە پێوەندیێن خوە یێن ب سلێمانیێ رە باش بکە.
هاکان فیدان بەشداری بەرنامەیەکە تەلەڤیزیۆنێ بوو، دەربارێ سیاسەتا ترکیەیێ یا دەرڤەیی وەلات دە ئاخڤی و د بەشەکە ئاخافتنا خوە دە بەهسا په‌كه‌كێ کر و گۆت: «په‌كه‌كێ ل ناڤ سینۆرێن ترکیەیێ جهەک کۆنترۆل نەکریە لێ ل ئیراق و سووریێ گەلەک جهـ د دەستێ وێ دەنە».
هاکان فیدان گۆت کو ل ئیراقێ دەمێن داویێ ژ بۆ تێکۆشینا ب په‌كه‌كێ رە و پارڤەکرنا ئیستخباراتێ بپێشکەتن هەیە و وان شەر دەرخستیە دەرڤەیی سینۆرێن خوە.
وەزیرێ کارێن دەرڤەیێ ترکیەیێ هاکان فیدان د بەردەوامیا ئاخافتنا خوە دە گۆت: «هوون دزانن وان ب بریارا لژنەیا ئەولەهیا نەتەوەیی، په‌كه‌كه وەکی رێخستنەکە قەدەخەکری راگهاند. ئەڤ پێنگاڤەکە گرینگە. تشتێ ژ بۆ مە گرینگ، گەلۆ ل دژی رێخستنێ پێنگاڤەکێ دئاڤێژە، ئیستخباراتێ پارڤە دکە، ئۆپەراسیۆنێ دکە و رێخستنێ ژ هنەک دەرفەتان ئاستەنگ دکە یان ناکە؟»
فیدان ئیدیعا کر کو «ئیراق د ناڤ خوە دە وەکی بەغدا، هەولێر و سلێمانیێ دابەش بوویە» و ب هەموو ئالیان رە هەڤدیتن، دیالۆگ و دانووستاندنێن وان هەنە.
هاکان فیدان دەربارێ سلێمانیێ (یەکیتیا نشتمانی یا کوردستانێ/یه‌نه‌كێ) دە گۆت:«ئەم ب سلێمانیێ رە ب ئاوایەکی ڤەکری دئاخڤن. هەڤدیتنێن کو د رایا گشتی دە خویا ناکن هەنە. من بەرێ ژی گۆت سلێمانی باژارەکی کەڤنارە. سلێمانی، مووسل، کەرکووک، هەولێر، زاخۆ… ئەڤ دەر ژ سەردەما ئۆسمانیان ڤە بوونە بەردەوامیا مە یا جۆگرافی و چاندی. ئەم پارچەیەک ژ وانن، ئەو ژی پارچەیەک ژ مەنە. سلێمانیێ ژ بۆ ئیمپاراتۆریا ئۆسمانی گەلەک بورۆکرات، متەسەوف و عالم گهاندنە. ب راستی جهەکی مبارەکە. مخابن تشتەکی ب ئێشە کو ڤەگوهەریە جیهەکی وها کو ڤیروسەکە وەکی په‌كه‌كێ باندۆرێ لێ دکە و کۆنترۆل دکە.
فیدان دیسا گۆت: ئەم د هەڤدیتنێن خوە دە زەلالن. ئەم دەک و دۆلابان ل کەسی ناکن. ئەم دبێژن، ئەڤ زلام خرابن. پێویستیا وە ب هەڤکاریا ڤان نینە. ئەم دخوازن پێوەندیێن مە باش بن، ئەم ناخوازن ناڤبەرا مە خراب بە. پشتگریێ نه‌دن وان. ئەم دێ ب وان رە شەر بکن، ئەڤنە پرسگرێکە لێ هوون پێوەندیا خوە سینۆردار بکن. رێ نەدن کو وەرن باژارێن وە. بلا بالافرگەها وە ب کار نەیینن.
رێ نەدن کو ژ نەخوەشخانەیێن وە سوودێ وەرگرن. ئەگەر نا، دێ ئۆپەراسیۆنێن مە بەردەوام بکن. ئەم ل ناڤەندا سلێمانیێ ژی و ل بەژاهیا وێ ژی ئۆپەراسیۆنان دکن.
نە پێکانە، ئەم دەستوورێ بدن هەبوونا وان. ئەم نکارن ل هەمبەری کەسێن ئالیکاریا وان دکن، وەکی کو تشتەک نەبوویە تەڤبگەرن».
فیدان هەروها مژارا شنگالێ ژی ئانی رۆژەڤێ و گۆت: «د ناڤبەرا مە و ئیراقێ دە هەڤتێگهشتنەکە هەڤپارا باش هەیە. دەست بهێزکرنا سینۆر هاتیە کرن. ل هەرێمێ پێنگاڤا هەری گرینگا کو دڤێ بێ ئاڤێتن ئەوە کو په‌كه‌كه ژ شنگالێ وەرە دەرخستن. ترکیە خەباتێن ئیستخباری و چاڤدێریێ ددۆمینە و تشتێن تێن دیتن ب ئیراقێ رە تێنە پارڤەکرن».
