د خوەپێشاندانێن ل ئدلبێ یێن ل ھەمبەر دەستەیا تەحریر ئەل-شام (نوسرەیا بەرێ) دە، ئالۆزی دەرکەت و چەند چالاکڤان ھاتن گرتن و بریندارکرن.
ل گۆری مەدیایا عەرەبی، ل ئدلبێ د خوەپێشاندانێن ل دژی دەستەیا تەحریر ئەل-شامێ دە، شەر و ئالۆزی دەرکەتن و چەکداران ھەژمارەک کەس و چالاکڤان گرتن و ھەژمارەک ژی بریندار بوون.
ژ ئالیێ خوە ڤە، رەوانگەھا سووری بۆ مافێن مرۆڤ (SOHR) راگھاند، پشتی دژواربوونا شەر و ئالۆزیان، چەکدارێن تەحریر ئەل-شامێ رێبەندێن نوو ل دەردۆرا ئدلبێ دانین و ب دەھان چەکدار ل سەر ڤان رێبەندان بجھ کرن و رێیێن کو دچن ئدلبێ ژی گرتن.
ل ئدلبێ ب مەھانە خوەپێشاندان ل دژی کریار و بنپێکرنێن چەکدارێن تەحریر ئەل-شامێ و سەرکردەیێ وێ ئەبوو محەمەد ئەل-جۆلانی بەردەوامن و خەلکێ ئدلبێ داخوازا ژناڤبرنا وێ گرۆپێ دکن.
ژ 25 شباتا 2024 ڤە، ل باژارێ ئدلبێ و باژارۆکێن مەرات مسرین، بنیش، ھەزانۆ، کەفر لۆسین، دێر حەسەن، ئەریحا، جسر ئەل-شخوور و ھەژمارەک ژ کامپێن کۆچبەران ل گوندەوارێ ئدلبێ، لگەل باژارۆکێن عەتارەب و دارات عززێ ل گوندەوارێ رۆژئاڤایێ حەلەبێ، خوەنیشاندان ل دژی زۆردەستیا دەستەیا تەحریر ئەل-شامێ بەردەوامن.
خوەنیشاندەر داخوازا چەند پرەنسیپان دکن، د ناڤ وان دە پێکانینا رەفۆرمێن راستەقینە، ئازادکرنا گرتیێن کو تاوان نەکرنە، ھلوەشاندنا ئەل-جۆلانی، ھلوەشاندنا دەزگەھا ئەولەکاریا گشتی ب شێوەیێ وێ یێ نھا و ڤەکرنا ئەنیێن شەر لگەل رەژیمێ، ژ بۆ ڤەگەراندنا باژار و باژارۆکان ژ دەستێ رەژیمێ.
