زانیاریێن نوو دەربارێ کەتنا ھەلیکۆپتەرا سەرۆکێ ئیرانێ

 ل دوو زانیارێن تلەڤزیۆنا فەرمی یا ئیرانێ، ھەلیکۆپتەرا سەرۆکێ ئیرانێ ئیبراھیم رەیسی تووشی روودانەکێ بوویە.

ھەیڤا سۆرا ئیرانی د ڤی واری دە راگەھاند، “مە چ زانیار ل سەر رەوشا وێ ھەلیکۆپتەرێ و رەوشا سوارێن وێ نینن”.

وەیزرێ ناڤخوەیێ ئیرانێ راگەھاند، “تیمێن ھاوارھاتنێ نەگەھشتنە جھێ وێ روودانێ.”

ئاژانسا فارسی یا ئیرانێ ژی ژ ئالیێ خوە ڤە داخواز ژ وەلاتیێن وی وەلاتی دکە کو لاڤایان ژ بۆ رەیسی و سوارێن دن یێن وێ ھەلیکۆپتەرێ بکن.

مەدیایا ئیرانێ ئاماژەیێ ددە، ھەتا نھا ئەو ھەلیکۆپتەر نەھاتیە دیتن.

جھێ کەفتنا وێ ھەلیکۆپتەرێ گوندێ ئۆزیێ یێ گرێدایی باژارۆکێ وەرزەقانێ یێ پارێزگەھا ئازەربایجانا رۆژھلات بوو. ئەو جھ 65 کیلۆمەتران ژ تەورێزا ناڤەندا وێ پارێزگەھێ دوورە کو جھەکی چیایی و دارستانەکا ھمبزە.

20 تیمێن ھاوارھاتنێ ژ بۆ وی جھی ھاتنە برێکرن. ئەو تیم گەھشتنە وی جھی و گەریان و پشکنین ژ بۆ ڤەدیتنا وێ ھەلیکۆپتەرێ بەردەوامن.

ھەیڤا سۆر راگەھاندیە، “ژ بەر مژ و مۆرانێ و دژواریا وی جھی، پرۆسەیا لێگەریان و پشکنینێ ژ بۆ دیتنا وێ ھەلیکۆپتەرێ دەمەکە زێدە دخوازە”.

تیمێن ھاوارھاتنێ ژ بۆ پشکنینا وێ دەڤەرێ فەیدەیی ژ درۆنێن چاڤدێریێ وەردگرن.

ل دوو راپۆرتان، ھەلیکۆپتەرا سەرۆکێ ئیرانێ ل ناڤ دارستانا دیزمارێ د ناڤبەرا ھەر دو گوندێن ئۆزی و پیر داودێ دە کەفتیە خوارێ.

رەیسی سەردانا پارێزگەھا ئازەربایجانا رۆژھلاتا ئیرانێ کریە، تلەڤزیۆنا دەولەتا ئیرانێ راگەھاندیە، “ئەو روودان ل دەڤەرەکە نێزی باژارێ جوفایێ ل سنۆرێ ئازەربایجانێ و نێزی 600 کیلۆمەتران (375 میلان) ل باکورێ رۆژئاڤایێ تەھرانا پایتەختا ئیرانێ روو دایە”.

ئاژانسا نووچەیان یا دەولەتا ئیرانێ ئیرنا راگەھاند، “وەزیرێ دەرڤەیێ ئیرانێ حسێن ئەمیر عەبدولاھیان و پارێزگەرێ پارێزگەھا ئازەربایجانا رۆژھلاتێ ئیرانێ و بەرپرسێن ھەڤالێن رەیسی د وێ ھەلیکۆپتەرێ دە بوون، یەک ژ بەرپرسێن حکوومەتا ناڤخوە پەیڤا “کەفتنە خوارێ” ژ بۆ وەسفکرنا وێ روودانێ ب کار ئانیە لێ ژ بۆ رۆژنامەیەکا ئیرانی دانپێدان کریە کو ھێشتا ئەو نەگەھشتیە جھێ وێ روودانێ”.

تلەڤزیۆنا دەولەتێ دبێژە، “تیمێن رزگارکرنێ بزاڤ کریە کو بگەھن وی جھی لێ ژ بەر خرابیا کەش و ھەوایێ رێ نەبوو کو بگەھن جھێ وێ روودانێ”.

ئیران ھەلیکۆپتەرێن جودا جودا ل وەلاتێ خوە ب کار تینە لێ سزایێن ناڤدەولەتی رێ نەدایە کو پارچەیێن وان بگەھن ئیرانێ، ئەو بالافرا سەربازی ڤەدگەرە بەری شۆرەشا ئیسالمی یا ئیرانێ یا سالا 1979.