مێھر: سەرۆککۆمارێ ئیرانێ ئیبراھیم رەیسی و شاندەیا لگەل جانێ خوە ژ دەست دانە

ئاژانسا “مێھر” یا ئیرانێ راگھاند، ھەموو کەسێن د ھەلیکۆپتەرا سەرۆکۆمارێ ئیرانێ دە بوون، جانێ خوە ژدەست دانە.

ئاژانسا نووچەیان یا “مێھر” ئیرۆ 20 گولانا 2024 راگھاند، ھەلیکۆپتەرا سەرۆککۆمارێ ئیرانێ ئیبراھیم رەیسی پشتی زێدەتری 18 دەمژمێران ژ لێگەرینێ، ل ھەرێمەکا چیایی یا باکورێ رۆژئاڤایێ ئیرانێ شکەستی ھات دیتن.

ل گۆری وێ ئاژانسێ، سەرۆککۆمارێ ئیرانێ ئیبراھیم رەیسی، وەزیرێ دەرڤە حوسێن ئەمیر عەبدولاھیان، ئیمامێ ئینیێ یێ تەوریزێ محەمەد عەلی ھاشم، پارێزگارێ ئازەربایجانا رۆژھلات مالک رەحمەتی و تیما ھەلیکۆپتەرێ جانێ خوە ژدەست دان. لێ حکوومەتا ئیرانێ ئەڤ نووچە پشتراست نەکریە.

ھەلیکۆپتەرا کو سەرۆککۆمارێ ئیرانێ، وەزیرێ دەرڤە و 2 رایەدارێن دن یێن پایەبلندێن ئیرانێ تێ دە بوون، دوھ پشتی نیڤرۆ ل ھەرێمەکا چیایی یا ل باکورێ پارێزگەھا ئازەربایجانا رۆژھلات کەتبوو خوارێ.

ئیبراھیم رایسی پشتی ھەڤدیتنا لگەل سەرۆککۆمارێ ئازەربایجانێ ل خالا سفرا سینۆری یا ھەر دو وەلاتان و ڤەکرنا بەنداڤەکێ، ب ھەلیکۆپتەرێ بەر ب باژارێ تەوریزێ، ناڤەندا پارێزگەھا ئازەربایجانا رۆژھلات ڤە برێ کەت. شاندا لگەل د سێ ھەلیکۆپتەران دە بوو، ژ وان ھەر سێ ھەلیکۆپتەران ژی، ھەلیکۆپتەرا کو سەرۆککۆمارێ ئیرانێ تێ دە بوو کەت خوارێ.

نووچەیا کەتنا ھەلیکۆپتەرێ دوھی دەمژمێر 16:00 ھات راگھاندن و تیمێن رزگارکرنێ بەر ب جھێ بوویەرێ کەتن رێ دەست ب لێگەرینێ کرن.