خامنەیی دەما ھلبژارتنێن نوویێن سەرۆککۆماریا ئیرانێ ئەشکەرە کر

رێبەرێ کۆمارا ئیسلامی یا ئیرانێ 5 رۆژ شینا گشتی راگھاند و دەما ھلبژارتنێن نوویێن سەرۆککۆماریێ ژی ئەشکەرە کر.

رێبەرێ کۆمارا ئیسلامی عەلی خامنەیی ژ بەر کۆچا داوی یا سەرۆککۆمارێ ئیرانێ ئیبراھیم رەیسی، وەزیرێ دەرڤە حوسێن ئەمیر عەبدولاھیان و کەسێن پێ رە د بوویەرا کەتنا ھەلیکۆپتەرێ دە، سەرساخی خوەست.

ھەروھا رێبەرێ کۆمارا ئیسلامی عەلی خامنەیی، ل سەرانسەری وی وەلاتی 5 رۆژان شینا گشتی راگھاند.

خامنەیی ئاماژە ب وێ ژی کر: ل گۆری مادەیا 131 یا دەستوورێ ئیرانێ، جیگرێ یەکەمێ سەرۆکۆمار محەمەد مۆخبر دێ دەستھلاتا جیبجیکار برێڤە ببە. د ڤی واری دە دڤێت د ناڤا 50 رۆژێن بێ دە، کار ژ بۆ لدارخستنا ھلبژارتنێن سەرۆککۆمارێ نوو بێ کرن.

ژ ئالیێ خوە ڤە، بەردەڤکێ ئەنجوومەنا پاراستنا دەستوورێ ھادی تەھان ژ رۆژنامەڤانان رە راگەھاند، جیگرێ یەکەمێ سەرۆککۆمار محەمەد مۆخبر، پشتی ئەرێکرنا عەلی خامنەیی، پۆستێ سەرۆککۆمار وەرگرت، ھەتا کو سەرۆکەکی نوو تێ ھلبژارتن.

محەمەد مۆخبر کییە؟

محەمەد مۆخبر، 68 سالییە، خوەدیێ دو دۆکتۆرایێن د یاسایا ناڤدەولەتی و رێڤەبرنێ دەیە.

وی سەرۆکاتیا کۆمیتەیا جیبجیکرنا فەرمانا ئیمام خومەینی کریە، کو سازیەکا حکوومەتێ یە و تایبەتە ب کارێن خێرخوازیێ. د ھەمان دەمێ دە رێڤەبەرێ جبجیکار و جیگرێ سەرۆکێ کۆمپانیایا پێوەندیێن خۆزستانێ بوو.

د سالا 2010 دە، یەکیتیا ئەورۆپایێ ژ بەر بەرنامەیا ئیرانێ یا مووشەکی، ناڤێ وی خستبوو لیستەیا سزایان.

د چلەیا 2021 دە، کەتبوو لیستەیا سزایێن خەزینەیا ئامەریکایێ.

د تەباخا 2021 دە، سەرۆککۆمار ئیبراھیم رەیسی، ئەو وەک جیگرێ یەکەمێ سەرۆککۆمار دەستنیشان کر.

دەستوورا ئیرانێ:

ل گۆری مادەیا 131 یا دەستوورا ئیرانێ، سەرۆککۆمار پشتی پۆستا رێبەرێ بلند، وەک بەرپرسێ ھەری بلندێ وەلات تێ.

ھەر د خالا 131 دە ژی تێ گۆتن کو سەرۆککۆمار ژ بەر پێکانینا دەستوورێ بەرپرسیارە و سەرۆکاتیا دەستەیا جبجیکار دکە.

ھەروھا د مادەیا 131 یا دەستوورێ ئیرانێ دە ھاتیە، د ئەگەرا مرن، نەبوونا یان نەخوەشیا سەرۆککۆمارێ ئیرانێ دە، جیگرێ یەکەمێ سەرۆککۆمار ب ئەرک و بەرپرسیاریێن سەرۆککۆمار رادبە.

ھەر د خالا 131 یا دەستوورێ دە ژی تێ گۆتن کو ژ بۆ پێکانینا رێکارێن ھلبژارتنا سەرۆککۆمارێ نوو، د ناڤا 50 رۆژان دە کۆمیتەیەک بهێت ئاڤاکرن.