فەرماندارەکی بەرێ یێ پەکەکێ ئاشکەرا دکە، ژ ئالیێ پەکەکێ ڤە ھەژمارەک کەچ و کورێن خەلکێ سلێمانیێ ل قەندیلێ ھاتنە گرتن و ئیشکەنجە کرن.
فەرماندارێ بەرێ یێ پەکەکیێ خەلیل محەمەد راگەھاند: “د ناڤ پەکەکێ دە دەست ب تەسفییا ناڤخوەیی ھاتیە کرن، ئەوێن ھەستێن کوردستانپەروەر و نشتمانپەروەر ل گەل وان ھەنە تێن دوورخستن، یان ژی ب سەناریۆیێن جودا تێن تەسفیەکرن. نھا پەکەکە بوویە ئاموورەکێ لیستۆکێن ئیستخباراتی یا ل ناڤچەیێ. ھەر دەمەکی کو بخوازن باشوورێ کوردستانێ تێکبدن، ئاموورێ ھەری باش پەکەکەیە، ژ بۆ وێ ژی نھا ل باشوورێ کوردستانێ دەست ب زێدەگاڤیان کرنە.
ھەرواھا گۆت: “پەکەکە نە تەنێ ل باشوورێ کوردستانێ، ل باکورێ کوردستانێ ژی پشتی شەرێ خەندەکان، بەر ب پاش ڤە چوویە، نھا پەکەکێ فێلا بکارتینە و دبێژە ئەم ل سلێمانیێ نینن، لێ ب دەھان و ب سەدان گرۆپ ئاڤا کرنە. ب تایبەت ژی ل دەڤەرا سلێمانیێ، کو بەرێ ب رێیا پەکەکێ ڤە دەستێ لەشکەرێن ترکیێ گەھەشت ناڤچەیێن سینۆری، کو ژ بۆ وێ ژی سەدان گوندێن وێ دەڤەرێ ھاتن ڤالا کرن.”
خەلیل محەمەد گۆت: “پەکەکە ل گەلەک جیھ و ناڤچە و دەڤەرێن جودایێن سینۆرێ پارێزگەھا سلێمانیێ چالاکیێن وێ ھەنە، وایە د چاپەمەنیا وان بخوە دە ژی ئەم دبینن، بەردەوام ئاھەنگ و بۆنە و جڤین و خوەپێشاندان و مەشان دکن. چ ناڤ سلێمانیێ بە، چ ل دەڤەرا راپەرین، ل کۆیە و چەمچەمال و ناحیەیا تەکیە، ئیدارەیا گەرمیان و ھندەک ناڤچەیێن شارباژێر وان کارانە دکن. ئەگەر پەکەکە ل وان سینۆران نینە، چەند سالان درۆنێن ترکیێ چاوا ناڤ ب ناڤ کادرۆ و رێڤەبەر و ئەندامێن پەکەکێ دکوژە؟ ئیراق دەستێ خوە ل پشتا وان ددە، مووچە و بودجەیێ ژ بۆ وان دیار دکە، ب تایبەت ژ ئالیێ حەشدا شەعبی ڤە، ئەڤ ژی بوویە سەدەم کو پەکەکە د جیھا ل ھەمبەر داگیرکەران راوەستە، مژوولێ فتنەیانە و دژاتیا پارتیێن کوردستانێ دکە.”
فەرماندارێ بەرێ یێ پەکەکێ گۆت: “مە ژی بەرێ ژ رێڤەبەریا پەکەکێ پرس کر، چما چالاکیێن خوە ئەم نابنە باکورێ کوردستانێ؟ ل دژی مە راوەستان و ئەم وەک کرێگرتی و تێکدەر پێناسە کرن، گۆت وە پەیرەوا پارتیێ تێکدایە. ژ بۆ من پر سەیر بوو، ل باکورێ کوردستانێ چالاکی نەبوو، ھاتبوون ل باشوورێ کوردستانێ پرسگرێک چێدکرن و خەلک تەرۆر دکرن. ب وان کارانە ژی خەلکێ باکورێ کوردستانێ و ب تایبەت ژی ئەوێن خوەدی ھزرا نەتەوی و کوردینیێ، ب تەمامی خوە ژ پەکەکێ ڤەکێشاندن و باوەریا وان ب پەکەکێ نەما.”
ب ئاشکەرایی دیار کر کو رێڤەبەریا پەکەکێ باوەریا خوە ب کوردینیێ نەمایە و گۆت: “نھا مژوولی بازرگانی و پارە پەیداکرنێ نە. ب فرۆتنا پەترۆلا رۆژئاڤایێ کوردستانێ یا ژ ئالیێ پەیەدیێ ڤە و ڤەگەراندنا وی پارەیێ بۆ قەندیلێ و خەرجکرنا ژ بۆ رێخستنێن خوە یێن ئەوروپایێ ڤە مژوولن. دەرڤەیی وێ ژی ھندەک جوانێن باشوورێ کوردستانێ برنە قەندیلێ و ب ئاوایەکی ھۆڤانە ئیشکەنجە کرنە. ریجا دکم بلا مالباتێن وان بگەھن وان. پەکەکێ برنە بۆ بەشا خوەتەقاندنێ ل قەندیلێ و پەروەردە کرنە. ئارمانجا پەکەکێ ژ بۆ وێ ئەوە، کو ببێژن ل باشوورێ کوردستانێ ژی خەلک ھەیە ل سەر ھزرا پەکەکێ ھاتنە کوشتن، کو دەستھلات و ھەژەمۆنا خوە زێدە بکە.”
