هونەرمەندا پۆپ یا ترک هادیسێ د 23ێ گولانێ دا ل ئامەدێ کۆنسێرتەک گێرا. کۆنسێرت ل ناڤەندا چاند و کۆنگرەیێ یا «سەزائی قاراکۆچ» یا گرێدایی شاره‌دار‌ییا ئامەدێ هاته گێران، ئانكو ل هه‌مان جهێ كو شاره‌دار‌ییا ئامەدێ دەستوور نه‌دایه کۆنسێرتا هونه‌رمه‌ند دۆسۆ دۆسی یێ کورد، لێ دەستوور دا هادیسێ یا ترک، ئەڤ یەک بوو جهێ نیقاشێ.
كونسێرتا دۆسو دۆسی ل به‌ر بوو د 19ێ گولانێ دا هاتبا ل دارخستن، لێ ژ ئالیێ شارەدارێن نوو یێن پارتیا دەمێ ڤە هات بەتالکرن. كۆمپانیا «دۆسۆ دۆس» ل باژارێن کوردان یێن وەک ئاگری و جزیرێ تەڤلیبوونێن مەزن یێن مووزیکێ ساز دكه‌ن و ژ بوو دانه‌نیاسینا باژارێن کوردان کەدەکا مەزن ددەن.
حکمەت ئاراسلان كو ب «دۆسۆ دۆسی» تێ ناسین کوردە و خەلکێ بازیدێ یە. ل باکورێ کوردستانێ گەلەک كارێن چاندی و هونەری كرینه. هونەرمەندێن کورد و یێن بیانی بەشداری كۆنسێرتێن وی دبن. کەسێن کو بەشداری كۆنسێرتێ دبن ب ئه‌دایا وی یا رەنگین دەمێن پڕ ب جۆش دەرباس دکه‌ن. لێ ژ دەستپێکا كۆنسێرتان ڤە راستی رەخنەیێن کەسێن نێزیکی په‌كه‌كێ هات. سەدەمێن ڤان رەخنەیێن په‌كه‌كێ نه چاندی نە، سیاسی نە. گرووپا «دۆسۆ دۆس» وەکە هشمەندی نێزیکی کوردان بوو، لێ چ په‌یوه‌ندییا وێ ب پککێ ڤه نینه و په‌كه‌كه ژی، ژ بلی خوە چ گرووپ – پێکهاتەیێن باکورێ کوردستانێ قەبوول ناکەت. ڤان گرووپان وەک سیخور پێناسە دکەت، دژاتییا وان دکەت، شاهییێن وان ئاستەنگ و بەتال دکەت و ئارێشەیان بۆ وان ده‌ردئێخیت.
خالا بالکێش ئەوە کو په‌كه‌كه ڤێ یەکێ تەنێ ل باکورێ کوردستانێ ل گه‌ل کوردان دکەت. هەر جورە هونەرمەندێن ترک و کەسێن دی دهێن ل کوردستانێ چالاکیان دكه‌ن كۆنسێرتان دگێرن. لێ په‌كه‌كه ژ بلی خوە رێناده‌ت کو چ لایەنەکی کوردستانی ل باکوور كارێن چاند و هونەری بكه‌ت.
د ڤێ چارچۆڤەی دا فەستیڤالا «دۆسۆ دۆس» ژ ئالیێ شارەدارییا ئامەدێ ڤە هات قەدەغەکرن. پشتی نه‌رازیبوونێن ل سەر سۆشیال میدیایێ، شاره‌دار‌ییا ئامەدێ راگهاند کو وان ژ بەر “سەدەمێن ئابۆری” دەستوور نەدایە، لێ وان ئەڤ یەک تەنێ ژ بۆ بێده‌نگكرنا نه‌رازیبوونان كر. ژ بەر کو كۆمپانییا «دۆسۆ دۆس» هەتا نها بۆ چ فەستیڤالێن خوە بودجه ژ شارەداریێ نەخواستنە و هەموو كۆنسێرتێن خوه بێ به‌رانبه‌ر دگێرن.
شاره‌دار‌ییا دەم پارتیێ یا ئامەدێ، كۆنسێرتا هادیسێ یا ترک قەبوول کر، لێ كۆنسێرتا «دۆسۆ دۆسی» قەبوول نەکر. شارەدارییێ ب ڤێ هەلوەستا خوە راستی زیهنیەتا خوە و جوداکارییا خوە ل دژی کوردان ب زه‌لالی ئاشكه‌را كر.
ژێدەرا ڤێ زیهنیەتێ هەلبەت په‌كه‌كه یه. بە داخەوە ئەڤ هەلوەستا په‌كه‌كێ یا کو بۆ هەموو دەردۆرێن ترک ڤەکری یه و تەنێ بۆ کوردان گرتی یه، مرۆڤی د ئێشینیت. ل ئیراقێ بۆ حەشدا شەعبی ئەرێ، لێ بۆ پێشمەرگەیان نا؛ ل رۆژئاڤا بۆ چەپێن ترک، عەرەب و رژێمێ ئەرێ لێ بۆ په‌ده‌كه‌سێ و پێکهاتەیێن کوردان نا؛ ل ئیرانێ ژی بۆ ئیتلاعات و فارسان ئەرێ لێ بۆ په‌ده‌كه یا ئیرانێ و پاکێ نا؛. ئەڤ هشمەندییا په‌كه‌كێ یا دژه – کورد ب هەموو کار و خەباتێن وێ ڤه یا به‌لاڤ و دیاره، جیهانا چاند و هونەرێ ژی بەهرا خوە ژ ڤێ هەلوەستا په‌كه‌كێ وه‌رگرتیە. ل ترکیێ، باکورێ کوردستانێ و ئەورۆپایێ بۆ کەسێن کو نەبێژن “بژی سەرۆک ئاپۆ” جهـ ناهێته دان. هه‌گه‌ر ژ بەر ئه‌گه‌رێن پراگماتیک ژی جهەک ب هنده‌ك ئالیێن دی هاتبیته دان ژی، ئەڤ یەک تەنێ ژ بۆ پێدڤییا په‌كه‌كێ یه.
ئەم دشێین ڤێ شێوازێ په‌كه‌كێ ب فاشیزما نەرم پێناسه بكه‌ین.
