سەرۆککۆمارێ ترکیێ رەجەپ تەییب ئەردۆگان بەشداری راهێنانێن لەشکەری یێن ب ناڤێ EFES-2024 بوو و گۆت: “دێ ترکیە رێ نەدە کو ل سووریێ و باکور تەرۆریستانەک بێ ئاڤاکرن”.
ھەسەدە ل رۆژئاڤایێ کوردستانێ ئامادەکاریا ھلبژارتنێن ھەرێمی دکە و ئەڤ یەک ل خوەشیا ترکیێ ناچە، ترک ب ڤێ یەکێ پر عاجز و ب گومانە. پشتی بریارا ھلبژارتنان، رایەدارێن ترکیێ دەنگێ خوە بلند کرن و ئانین زمان کو ئەو چ جاران رێ نادن ل سینۆرێ ترکیێ خوەسەریەک بێ ئاڤاکرن.
سەرۆککۆمارێ ترکیێ رەجەپ تەییب ئەردۆگان رۆژئاڤایێ کوردستانێ، کو نها د بن دەستھلاتداریا ھێزێن سووریەیا دەمۆکراتیک و پەکەکێ دەیە، وەک تەرۆریستان ب ناڤ کر.
ئەردۆگان بەشداری راهێنانێن لەشکەری یێن ب ناڤێ EFES-2024 یێن ھێزێن چەکدارێن ترکیێ بوو. ئەردۆگانێ کو راهێنان دشۆپاند د ئاخاڤتنا خوە دە گۆت: “ئەم کریارێن د دەربارێ یەکپارچەییا ئاخا سووریێ دە ژ نێز ڤە دشۆپینن. ترکیا چ جاران رێ نادە کو ل سووریێ و باکور و ژ سینۆرێن خوەیێن باشوور وێداتر تەرۆریستانەک بێ ئاڤاکرن”.
