ئێریشەکە چەکداری ل سەر بالیۆزخانەیا ئامەریکایێ ل لبنانێ هات کرن

ئێریشەکە چەکداری ل سەر بالیۆزخانەیا ئامەریکایێ ل بەیرووتا پایتەختا لبنانێ هات کرن. ئارتێشا لبنانێ دبێژە، «ئێریشکەرەک بریندار بوویە».

سبەها ئیرۆ (چارشەم، 05.06.2024) ئێریشەکە چەکداری ل سەر بالیۆزخانەیا ئامەریکایێ ل بەیرووتا پایتەختا لبنانێ هات کرن.

تەڤی کو مەدیایا خوەجهی یا لبنانێ راگەهاند کو ئەو ئێریش ژ ئالیێ سێ چەکداران ڤە هاتیە کرن و چەکدارەک ژ بەر رووبرووبوونا ب هێزێن ئەولەهیێ یێن وێ بالیۆزخانەیێ رە هاتیە کوشتن، لێ ئارتێشا لبنانێ د راگەهاندنا خوە دە ئەو یەک رەد کر و گۆت، «تەنێ چەکدارەکی ئەو ئێریش کریە کو خوەدیێ ناسنامەیا سووریەییێ یە و ژ ئالیێ ئەندامێن ئارتێشێ ڤە هاتیە بریندارکرن».

د عەینی دەمێ دە بالیۆزخانەیا ئامەریکایێ ل بەیرووتێ د راگەهاندنەکێ دە ئەشکەرە کر، «ئەو ئێریش ژ ئالیێ کۆمەکە سێ کەسی ڤە هاتیە کرن و چەکێ سڤک هاتیە بکارئانین». تەکەز ژی کر، «تەڤایا دیپلۆماتکار و کارمەندێن بالیۆزخانەیا ژ بەر دەستێوەردانا ئارتێشا لبنانێ و دەزگەهێن ئەولەهیێ بسلامەتن».

وێ بالیۆزخانەیێ د راگەهاندنا خوە دە ئاماژە ژی دا، «ئەم ب دەستهلاتدارێن لبنانێ رە ژ بۆ ڤەکۆلانا وێ روودانێ د هەڤاهەنگیێ دەنە».