ئیرۆ 5/6/2024 جیگرێ وەزیرێ دەرڤە یێ ئیراقا فەدەرال ھیشام عەلەوی راگەھاند، ل گەل حکوومەتا ترکیێ د گۆتووبێژێ دە نە ژ بۆ چارەسەرکرنا پرسگرێکا ھەبوونا ھێزێن پەکەکێ ل ئیراقێ و تەکەز کر، ھەبوونا ھێزێن پەکەکێ ل ئیراقێ نەیاسایی نە و ژ نیگەرانیێن ترکیێ تێدگەھن.
عەلەوی ئاماژە ب وێ یەکێ ژی کر کو ئیراق گرنگیێ ب کارکرنا ل گەل وەلاتێن جیران ددە، ئەڤ ژی ژ بۆ سەقامگریا ھەرێمی و داوی ئانینا ب ململانێ و شەرێن ل ناڤچەیێ.
ھەروھا تەکەز کر، کو بێی بدەستانینا ئاشتیێ، د شیان دە نینە رەوشا ئابۆری ژی بهێت باشکرن.
جیگرێ وەزیرێ دەرڤەیێ ئیراقێ ھەروھا بەحسا ئەزموونا چەکدارێن مووجاھیدینی خەلک یا ئیرانێ کر، کو د دەما رەژیما بەعس یا ھلوەشیایی دە ل ئیراقێ ھاتبوون بجیھ کرن و پشترە ب رێیا نەتەوێن یەکبوویی ڤە ئەو شاندن دەرڤەیی وەلات و ل گۆر جیگرێ وەزیرێ دەرڤەیێ ئیراقێ ئەو ئەزموونەکا سەرکەفتی بوو و ھەمان کار ژ بۆ شاندنا دەرڤەیا چەکدارێن پەکەکێ ل ئیراقێ دکارە بێ کرن.
