سێ چاڤکانیێن ئەولەهیێ سەلماند کو ژ ئەنجامێ ئێریشەکە ئسرائیلێ ل سەر گوندێ جۆیایێ ل باشوورێ لبنانێ، ب کێمی ڤە چار کەس هاتنە کوشتن کو یەک ژ وان فەرماندەیەکی بلندێ حزبوللاها لبنانێ یە.
چاڤکانیێن ئەولەهیێ راگەهاند، «ئسرائیلێ ئێریشەک کریە سەر گوندێ جۆیایێ و چار کەس هاتنە کوشتن کو یەک ژ وان فەرماندەیەکی بلندێ مەیدانی یێ حزبوللاها لبنانێ یە».
چاڤکانیان ئەو فەرماندە وەکی سەرۆکێ وێ کۆمێ ناساندیە، ل ناڤەراستا دەڤەرێن سنۆری یێن باشوورێ لبنانێ، کو هەژمارەکە وان باژارکان ڤەدگرە یێن کو هەری زێدە زرار ژ بەر شەرێ ناڤبەرا ئسرائیل و حزبوللاهێ گەهشتنە وان.
ژ ئالیەکی دن ڤە حزبوللاها لبنانی کوشتنا تالب سامی عه‌بدوللا یێ سەرکردە کو ناسناڤێ ئەبو تالب ژێ رە هاتیە دان د ئێریشەکە ئسرائیلێ دە سەلماند.
هەروەسا راگەهاند، ژیێ ئەبو تالب 55 سالن و خەلکێ باژارکێ ئەدشیتێ یێ باشوورێ لبنانێ یە.
وان چاڤکانیێن ئەولەهیێ ئاماژە ژی دایە، رۆلێ ئەبو تالب ژ رۆلێ فەرماندەیێ بلندێ حزبوللاها لبنانی ویسام ئەلتاویل، کو ل چلەیا ئیسال د ئێریشەکە ئسرائیلێ دە هات کوشتن، کێمتر نینە.
ژ پشتی سەرهلدانا شەرێ غەززەیێ ل جۆتمەها 2023ێ هەتا نها، نێزی 300 چەکدارێن حزبوللاهێ هاتنە کوشتن کو فەرماندە و ئەندامێن بەرپرسیارێن سەرەکی ژی د ناڤ دە نە.
