کارەساتا کو ژ بەر شەواتا کو د ناڤبەرا ئامەد و مێردینێ دە دەرکەتیە و باندۆر ل دەھان گوندان کریە، دلێ مە ژی ب خوە رە شەوتاند. ھەتا نھا 12 کەسان ژییانا خوە ژ دەست دایە، ب دەھان گوند و ب ھەزاران دۆنم ئەرد زرار دیتنە، ب ھەزاران ئاژەل ژی شەوتینە. زارۆکێن کوردان یێن شەوتی و بەرخ-پەزێن شەوتی ل سەر ئاخا کوردان ب ھەڤ رە دنالن. مرۆڤ بێ ھێڤی بوونەکا ووسا دژی کو ناخوازە ل دیمەنێن ڤی ئاگری ژی بنێرە. مرۆڤ دخوازە تشتێن کو دیتین ژی، ژ بیر بکە.
ھەر کەس رەخنە دکە و دبێژە “دەولەتێ د وەختێ خوە دە موداخەلەیی شەواتێ نەکر و ب خەمساری تەڤگەریا.” قەی تشتەک ووسا دبە؟ گەلۆ یێ ب جینایەتێ ھاتی قەتلکرن دکارە ژ قاتلێ خوە گازندا بکە. ژ دژمنێ خوە رە بێژە “بۆ ئەز نەبرمە دۆکتۆر”؟ ئەم نکارن کوژەرێ خوە رەخنە بکن ژ بەر کو ئەو ب خوە قاتلێ مەیە. دەولەتا ترک ئاگری ناتەمرینە، ژ بەر کو ئەو داگیرکەرێ ئاخا تەیە، ئەرکا وی شەوتاندنا مال و ملک و ھەموو ژییانا تەیە. ئەو دێ وەلاتێ تە بشەوتینە و بکە خوەلی دا کو دەستھلاتا خوە یا کۆلۆنیال ل سەر ئاڤا بکە.
کوردێن باکور یێن ھەری خوەندەڤان، یێن کو ئەڤ سەد سالن د بن کۆلۆنیالیزما ترک دە دنالن، وەکی کو ئەو کەسێن وەکھەڤ و ئازاد یێن دەولەتا ترکن، دەولەتێ رەخنە دکن. بابێ من، برایێ من دییا من و خویشکا من، ئەو دەولەت نەیا تەیە ئەو دەولەت داگیرکەر و وێرانکارێ وەلاتێ تەیە. پارتیا دەمێ داخویانیەک ددە و دبێژە، “مودەخلەیا شەواتێ دەرەنگ مایە”. مخابن ما پارتییەک ئەڤ قاس بێھش دبە.
ئەحمەت ترک سیاسەتمەدارێ ھەری تەمەندرێژێ باکورێ کوردستانێ یە، سەرۆکێ پارتیێ بوو، پارلامەنتەر بوو، باب و کالێن وی ھەموو ئاغا بوون، نها ژی کارسازەکی دەولەمەندە و ھەمان دەم ژی شارەدارێ مێردینێ یە، ل سەر کەڤرەکێ روونشتییە و بێچارە، بێچارە ل رەوشێ دنێرە. د ناڤا بێ هێڤی بوونەکا مەزن دە ب خەمگینی ل دیمەنان دنێرە. ئەحمەت ترکێ 80 سالی، پێ دحەسە کو کورد چ بکن بلا بکن، کۆمارا ترکیێ نەیا وانە، لۆما ژی د ناڤا خەمگینی و نەچاری دە دفەتسە.
بەلێ، کورد د رۆژھلاتا ناڤین دە گەلێ ھەری بێچارەیە کو د بن زۆردەستییا کۆلۆنیالیستان دە دنالە. ئەم چ پرسگرێکێ خوە د بن دە بکۆلن، ئەم دبینن کو سەدەما سەرەکی بێدەولەتبوونە. یێ کو ھەر رۆژ مالا کوردان دشەوتیتە نە ئاگرە بەلکو بێدەولەتبوونە. یێ کو ب گۆتنا دەولەت خەرابە و ژیانا بێ دەولەت رزگارییە رازی دبە، بزانە کو ئەو شریکێ دژمنییە. سەدەما بنگەھین یا کو ئیرۆ باکورێ کوردستانێ ئەوقاس بێچارەیە، بێدەولەتبوون و یا خەرابتر ژی ئەوە کو دەولەتا ترک وەکە دەولەتا خوە ببینی. کوردێن باکور ترکبوون و بێدەولەتبوون وەکە چارەسەری ژ بۆی خوە پەژراندییە. لێ ئەڤ نە سووچا کوردێ باکورە ئەڤ فکرە یێن لەعنەتی ئۆجەلانن کو د سەرێ وان دە چاندنە.
ئۆجالان و پارتیا وی پەکەکە 25 سالن ھەول ددن باکورێ کوردستانێ قانع بکن کو “بێدەولەتبوون ئازادییە، ترکبوون ئازادیا ھەری مەزنە.” لێ ئەڤ فکرێن ئۆجالان د ناڤا ئاگرێ ل مێردین و ئامەدێ دە جارەکە دن بوون خوەلی. یا راست ئەوە کو ھوون نەبن خوەدی دەولەت، ھوون نە تشتەکن د ناڤا ڤێ پەرگالا سیاسی یا جیھانێ دە. دەولەتا وە خەراب بە ژی، ژ بێدەولەتبوونێ ملیۆن جاران باشترە. دەولەتا خوە دەمۆکراتیزە کرن ھزار جارا ھێسانترە کو مرۆڤ بخوازە دەولەتا داگیرکەر دەمۆکراتیزە بکە. و کەسێن خوەدی دەولەت ھەر تم ژ کەسێن بێ دەولەت گاڤەکێ ل پێشن. پەرگالا وە، ھەر چەند پچووک بە ژی، مسۆگەرییا ژیانا وەیە.
ل باژارێ دوھۆکێ یێ ھەرێما کوردستانێ مەھا ئادارێ دە لەھی رابوو. ژ بەر لەھیێ نێزی ھەزار خانی ب باندۆر بوون، ب دەھان خانی ھلوەشیان و باژار رادەستی لەھیێ بوو. سرووشتی ب کارەساتەک مەزن ل سەر دوھۆکێ دە داگرت. لێ ھوون دزانن ھەما دەمەکی کورت دە چ چێبوو؟ سەرۆک بارزانی یەکسەر پێشمەرگەیێن گولان خستن ناڤا ئەرکی دە و شاند باژارێ دوھۆکێ. نێزیکی 300 پێشمەرگە ھاتن باژێری، مال ب مال، کۆلان ب کۆلان گەرییان ئالیکارییا خەلکێ کرن. مال و رێیێن باژاری پاقژ کرن. پارێزگارێ دوھۆکێ عەلی تەتەر دەولەمەندێن باژێری کۆمکرن و داکەتن کۆلانان و باژار پاقژ کرن. د ئەنجامێ دە کێمتر ژ ھەفتەیەکێ کارەساتا لەھیێ دەرباس بوو، زێدەتری 110 مالباتێن کو خانیێن وان ژ بەر لەھیێ وێران بووبوون خانی و 5 ھەزار دۆلار ھەر مالەکێ وەرگرتن. ھەروھا ھەرێما کوردستانێ نە دەولەتەکا سەربخوەیە، لێ ب ڤان دەرفەتێن خوەیێن سینۆردار ژی چوو ھەوارا خەلکێ خوە ژ بەر کو خەلک و ئاخ یا وێ بخوەیە. ئەڤ یەک ب تەنا سەرێ خوە فکرێن بێدەولەتبوونێ و ئایدۆلۆژیا بێدەولەتبوونێ کو ب دەھان رووپەلان و پەیڤێن فەلسەفی ئۆجالان خەملاندی، ب یەک ھەلوەستێ ژ ھۆلێ رادکە. بێدەولەتی مالوێرانییا ھەری مەزنە.
ئەو پەکەکەیا ھەرۆژ ئێریشی ھەرێما کوردستانێ دکە ڤێ راستییا ئازادییا ھەرێمێ نابینە و جاڤ پێ نارابن کو ببنە. پەکەکە “ل رۆژھلات یەکرێزییا ئیرانێ، ل باشوور یەکرێزییا ئیراقێ، ل باکور یەکرێزییا ترکییێ، ل رۆژئاڤا یەکرێزییا سوورییێ” دپارێزە. ئەڤ فکر جڤاکا کورد دکشینە ناڤا وندابوونێ و خوەکوشتنێ.
ھوونێ ببێژن وە دیسا مەسەلە ئانی سەر پەکەکێ. ببۆرە، لێ گەر ھوون بچن دۆکتۆر پێویستە ھوون بنگەھێ نەخوەشییا خوە بزانن دا کو نۆژدار بکارە چارەسەر بکە. د لاشێ کوردان دە نھا ئێشەک مەزن ھەیە ناڤێ ڤێ ئێشێ بێدەولەتبوونە. یێن کو بێدەولەتییێ وەکە ئازادی دبینن توشی ئێشا پەنچەشێرێ بوونە. یێن کو دخوازن لاشێ کوردان ساخ بکن، ئابۆریا وان باش بکن، شەرت و مەرجێن ژیانا وان باش بکن و ژ ھەر جورە کارەساتێن وەک شەوات و لەھیێ ب کێمترین زرارێ دەرکەڤن، دڤێت پێشی ل ڤێ نەخوەشیا بێدەولەتبوونێ خوە رزگار بکن.
بەلێ، بێدەولەتبوون فەلاکەتا تەئوری یا مەزنە. کورد ب ڤێ فەلاکەتێ رە روو ب روو نە. ھەیا کو ئەم دەست ژ ھەر جورە کۆلۆنیالیزمێ بەرنەدن، ل دۆرا فکرێن کوردستانی نەبن یەک ئەم نکارن کارەساتێن ل سەر وەلات و ملەتێ خوە تێک ببن. بلا ھێڤییێن مە نە شەوتن ئەم دێ ڤێ کارەساتێ ژی ل سەر خوە راکن. سەرێ گەلێ کورد و ب تایبەت مالباتێن قوربانییان ساخ بە.
