جیگرێ وەزیرێ دەرڤەیێ رووسیایێ د هەڤپەیڤینەکێ دە کو ل رۆژا سێشەمێ هات پارڤەکرن ژ ئاژانسا راگەهاندنێ یا رووسیایێ رە راگەهاند، «رووسیا لهەڤکرنەکە نوو و تەڤگر د پاشەرۆژەکە نێز دە ب ئیرانێ رە ئیمزا دکە».
جیگرێ وەزیرێ دەرڤەیێ رووسیایێ ئاندری رودەنکۆ ئاماژە دا، «ئەم پێشبینیێ دکن کو د دەمەکە گەلەک نێزیک دە ئەڤ لهەڤکرن بێ ئیمزاکرن ژ بەر کو دارێتنا تەکستا وێ نها گەلەک نەمایە کو تەمام ببە».
رۆیته‌رزێ پارڤە کریە، وەزارەتا دەرڤە یا رووسیایێ د دەستپێکا ڤێ مەهێ دە راگەهاندبوو کو کارکرنا ل سەر وێ لهەڤکرنێ ب ئاوایەکی دەمکی هاتیە راوەستاندن. د ئەینی دەمێ دە ئیرانێ ژی راگەهاندبوو، چ راوەستیان د بەرهەڤکرنا لهەڤکرنا نوو دە نینن.
رووسیا و ئیرانێ ل سالا 2001ێ لهەڤکرنەکە ستراتەژیک ژ بۆ دەما 20 سالان ئیمزا کریە و ل سالا 2020ێ ب ئاوایەکی ئۆتۆماتیکی ژ بۆ دەما پێنج سالان هات درێژکرن. ل دوو ئاژانسا تاسسێ یا رووسیایی، هەر دو ئالی ل سالا 2020ێ ل سەر وێ یەکێ هەڤنەرین بوون کو ل جهێ لهەڤکرنا ستراتەژیکا کەڤن لهەڤکرنەکە نوو بکن.
لهەڤکرنا سالا 2001ێ ئالیکاریکرنا د وارێن ئەولەهی و پرۆژەیێن ئەنەرژیێ دە بوو، وەکی بکارانینا ئاشتیانە یا ئەنەرژیا ئاتۆمی و چێکرنا وەستگەهێن ئاتۆمی، پیشەسازی و تەکنۆلۆژی.
رووسیا و ئیرانێ پەیوەندیێن خوەیێن وەبەرهێنانێ، سەربازی و ئەنەرژیێ موکۆمتر کریە. پشتی کو رووسیایێ ل سالا 2022ێ ئێریشی ئوکراینایێ کر، سزا ژ ئالیێ هەڤپەیمانێن کیێڤێ ڤە ل سەر مۆسکۆیێ هاتنە سەپاندن.
