سەرۆککۆمارێ ترکیێ رەجەپ تاییپ ئەردۆگان دبێژە، ئەو 40 سالن هەمبەری په‌كه‌كێ شەر دکن و هەتا نها باجێن مەزن دانە. هه‌ر وها گۆت: ب ئۆپەراسیۆنێن سالێن داوی، لڤ و تەڤگەرێن ئەندامێن رێخستنێ هاتنە ئاستا نەمانێ.
ئەردۆگان ل ئەنقەرێ د ئاکادەمیا پۆلیسان دە ئاخڤی و گۆت: «ترکیە ب جهێ خوەیێ ستراتەژیک ب گەفێن جودا رە رووبروو دمینە. ل هەمبەری هەموو تۆمەت و گەفان، دڤێ بەرگریان بپێش بخن. هەمبەری رێخستنا جوداهیخواز ئێدی، ئەم 40 سال ل پەی خوە دهێلن. مە هەتا نها د وارێ مادی و مانەوی ده گەلەک باج دان».
سەرۆکۆمارێ ترکیەیێ گۆت: «هێزا تو کەسی تێری ناکە دەولەتەکە وەکی ترکیەیێ یا ل سەر ماییا ئیمپاراتۆریەکە جیهانێ هاتیە دامەزراندن د ناڤ ئاڤێن تەنکێن فاشیزما نژادپەرەست و سووتال دە هەپس بکە».
ئەردۆگان ئاماژە ب یەکێ ژی کر: «د سالێن داوی دە مە سەرکەفتنێن دیرۆکی بدەست خستنە. ب هەولێن هێزێن ئەولەکاری ئەندامێن رێخستنا تەرۆرێ د ناڤا سینۆرێ مە دە ئێدی نکارن بلڤن. تەنێ سالا داوی، هەمبەری په‌كه‌كێ –كه‌جه‌كێ، 4877 ئۆپەراسیۆنێن ناڤا باژاران، 29918 ئۆپەراسیۆنێن بەژاهی هاتنە کرن. د ئۆپەراسیۆنان دە 7 ژێ د ناڤا لیستا سۆر دە، ب گشتی 1045 ئەندامێن په‌كه‌كێ هاتنە کوشتن».
