کوژەرێ مالباتەکە کورد ل رووسیایێ جەزایێ هەتاهەتایێ لێ هاتە برین

پشتی سێ سالان ژ کوشتنا 3 ئەندامێن مالباتەکە کورد ل رووسیایێ، دادگەهەکە رووسیایێ جەزایێ زیندانا هەتاهەتایێ ل تاوانبار بری.

رۆژا 16 ئیلۆنا 2021ێ، ل گوندێ ڤەلچانسکۆیێ سەر ب پارێزگەها ڤارۆنەژ یا رووسیایێ، کەسەکی ب ناڤێ ڤیكتۆر مێرسکۆڤ ئێریشی مالباتەکە کورد کر و داییک و کور و نەڤیێ وێ کوشتن.

دو رۆژ پشتی کوشتنا وان هەر سێ ئەندامێن مالباتا کورد، ڤیكتۆر مێرسکۆڤ یێ 54 سالی، کو نشتەجیهێ هەمان گوندە، ب تۆهمەتا کوشتنا گولستان ئیبراهیمۆڤا (59 سالی)، نادر (19 سالی) و عەزیز (5 سالی)، هات دەستەسەکرن، کو د دەما ئۆپەراسیۆنا دەستەسەرکرنێ دە ژی، ئەو رووبروویی هێزێن ئەولەهیێ بوو و هات بریندارکرن.

پشتی سێ سال و چەند روونشتنێن دادگەهێ، دادوەر د داویێ دە جەزایێ زیندانا هەتاهەتایی ل تاوانبار ڤیكتۆر مێرسکۆڤ بری.

ل گۆری دۆسیەیا لێپرسینێ و دانپێدانا تاوانبار، ناکۆکی ل سەر چێلەکێ بوویە، کو تاوانبار (ڤیکتۆر مێرسکۆڤ) خوەستیە چێلەکێ ژ وێ مالباتا کورد بکرە، لێ وان نەفرۆتیه‌ وی و کێشە دروست بوویە.

ل گۆری زانیاریان، تاوانبار ل تاوانا خوە موکور هاتیە و ژ کوشتنا وان هەر سێ کسان پۆشمان نەبوویە، لێ تەنێ گۆتیە کو کوشتنا زارۆکێ 5 سالی نە ب قەسد بوویە.

ل گوندێ ڤالچانسکۆی کو 165 کیلۆمەترە ل باشوورێ پارێزگەها ڤارۆنزهـ و 1076 کیلۆمەترە دووری مۆسکۆیێ یە، 400 وەلاتیێن رووسی، کورد و کۆمێن دن یێن ئەتنیکی لێ دژین.