وەزارەتا دەرڤە یا ئه‌مه‌ریکایێ راگهاند، هایا وان ژ گەفێن په‌كه‌كێ یێن ل سەر سینۆرێ هەرێما کوردستانێ و ترکیەیێ هەیە، لێ دڤێ ئۆپەراسیۆنێن ترکیەیێ ب هەڤاهەنگیا ب ئیراقێ رە بێن کرن.
بەردەڤکێ وەزارەتا دەرڤە یا ئه‌مه‌ریکایێ ماتیۆ میله‌ر د کۆنگرەیەکە رۆژنامەڤانی دە راگهاند، «مە داخواز ژ ترکیەیێ کریە کو ئۆپەراسیۆنێن خوە یێن ل دژی په‌كه‌كێ ب هەڤاهەنگیا ب حکوومەتا هەرێما کوردستانێ و دەستهلاتدارێن ئیراقێ رە بکە، دا کو زیان نەگهن سڤیلێن هەرێما کوردستانێ».
گۆت ژی: «ئەم وەک ئه‌مه‌ریکا هەست ب نیگەرانی و گەفێن کو چەکدارێن په‌كه‌كێ یێن ل ناڤچەیێن سینۆری یێن ترکیە و ئیراقێ دروست کریە دکن، لێ ئەم تەکەز دکن کو دڤێ ئۆپەراسیۆن ب هەڤاهەنگی بێن کرن، ژ بۆ ژیانا سڤیلان بێ پاراستن».
ئەڤ یەک د دەمەکێ دە یە، دژەتەرۆرا کوردستانێ دوهی 8ێ تیرمەهێ د داخویانیەکێ دە راگهاند، درۆنەکە ترکیەیێ ئۆتۆمۆبیلەکە چەکدارێن په‌كه‌كێ ل سەر رێیا تلقەسەب و شنگالێ بۆمبەباران کر و 2 کەس ب گرانی بریندار بوون.
هەر دەربارێ مژارا ئێریشێن ترکیەیێ ل سەر ناڤچەیێن سینۆری یێن هەرێما کوردستانێ دە، شێورمەندێ سەرۆکوەزیرێ ئیراقێ ئیبراهیم سومەیدەعی د هەڤپەیڤینەکە تەلەڤزیۆنی ل گەل کانالا «دیجلە» یا ئیراقی دە راگهاند، «ئۆپەراسیۆنێن لەشکەری یێن ترکیەیێ ل ناڤچەیێن سینۆری یێن هەرێما کوردستانێ، ب هەڤاهەنگیا د ناڤبەرا بەغدا و ئەنقەرێ دە تێن کرن».
