رێخستنا چاڤدێریا مافێن مرۆڤان (هیومان رایتس ووچ) رەخنە ل حکوومەتا ئیرانێ گرت گۆت: «ئیران ب توندترین شێوە رووبروویی کۆلبەران دبە».
رێخستنا هیومان رایتس ووچ د راپۆرەکێ دە دیار کر، تەنێ د سالا 2023ان دە ل سەر سینۆرێن د ناڤبەرا باشوور و رۆژهلاتێ کوردستانێ دە، 44 کۆلبەر هاتنە کوشتن و 463 کەس ژی بریندار بوونە کو %80 ژ وان ژ ئالیێ هێزێن ئیرانێ ڤە هاتنە کوشتن.
وێ رێخستنا چاڤدێریا مافێن مرۆڤان گۆت، هەری کێم 28 ژ قوربانیان جوان بوون و کۆلبەرێن کو ژ ئالیێ هێزێن ئیرانێ ڤە هاتنە دەستەسەرکرن، راستی ئەشکەنجەدانێ هاتنە.
رێخستنا مافێ مرۆڤان «هەنگاو» دوهی بەلاڤ کربوو، کۆلبەرەکی خەلکێ سەلاسی باواجانی ل سینۆرێ د ناڤبەرا رۆژهلات و باشوورێ کوردستانێ دە ب گولەیا راستەراستا هێزێن ئیرانێ هاتە کوشتن و 4 کۆلبەرێن دن ژی بریندار بوون.
پێشتر ژی هەنگاوێ راگهاندبوو، تەنێ د مەها هەزیرانا ئیسال دە هەری کێم 10 کۆلبەر هاتنە کوشتن یان هاتنە بریندارکرن کو %90 ژ وان راستی ژ ئالیێ هێزێن ئیرانێ ڤە تەقە ل وان هاتیە کرن.
هەروها هیومان رایتس ووچ کارێ کۆلبەریێ وەکە کارەکی دژوار و مەترسیدار ب ناڤ کر کو خەلکێ رۆژهلاتێ کوردستانێ ژ بەر بێکاری و هەژاریێ نەچارن کو ڤی کاری بکن.
پێشتر ژی، ئەندامێن پارلامەنتۆیا ئیرانێ گەلەک جاران بەحسا وێ یەکێ کربوون کو بێکاری و هەژاریا زێدە ل پارێزگەهێن رۆژهلاتێ کوردستانێ، بوویە سەدەم کو خەلک کارێ کۆلبەریێ بکن.
ئەندامێ ئەنجوومەنا بلندا پارێزگەهێن ئیرانێ قوباد کەرەمپوور ژی گۆرتبوو: زێدەتر ژ سەدی 50ێ کۆلبەران باوەرنامەیێن لیسانس و ماستەرێ ژ زانینگەهان وەرگرتنە، لێ ژ بەر نەبوونا کار، بەرێ خوە دانێ ڤی کارێ مەترسیدار کو دەما ژ مالێن خوە دەردکەڤن، هێڤیا وانا ڤەگەرێ نینە.
