ھێزێن ئاسایشا ھەرێما کوردستامێ ل باژارۆکێ قەرەھەنجیرێ یێ سەر ب کەرکووکێ ڤە رووبروویی 2 چەکدارێن داعشێ بوون و د ئەنجاما دە ئەندامەکی ئاسایشێ شەھید بوو.
رێڤەبرێ باژارۆکێ قەرەھەنجیرێ ئاڤێستا شێخ محەمەد راگھاند، 2 چەکدارێن داعشێ ب نیاز بوون ب مۆتۆرسیکلەتەکێ دەرباسی ناڤ دبستانەکێ ببن، لێ ھێزێن ئاسایشێ رووبروویێ وان بوون و کارین یەکی ژ وان بکوژن و یێ دن ژی بریندار بکن.
ب گۆتنا ئاڤێستا شێخ محەمەد، د ئەنجاما شەر و پەڤچوونان دە ئەندامەکی ھێزێن ئاسایشێ شەھید بوو و یەک دن ژی بریندار بوو.
ل سەر ڤێ ئێریشێ دەزگەھا ئاسایشا ھەرێما کوردستانێ د داخویانیەکێ دە راگھاند، ئیرۆ دەمژمێر 8:00 ھێزێن ئاسایشا کەرکووکێ بۆ گرتنا 2 چەکدارێن داعشێ چوون باژارۆکێ قەرەھانجیر و د ئەنجاما رووبرووبوونا وان دە، یەک ژ وان تەرۆریستان ھات کوشتن و یەک ژی ب برینداری ھات گرتن.
دەزگەھا ئاسایشا ھەرێما کوردستانێ دیار کر ژی، د شەر و پەڤچوونان دە کارمەندەکی ئاساییشێ یێ ب ناڤێ جوامێر عەزیز رەشید شەھید بوو و کارمەندەکی دن ژی بریندار بوو.
ھەر د ڤێ داخویانیێ دە ھات گۆتن، ئەو ھەر دو چەکدارێن داعشێ ب مەبەستا پێکانینا کریارێن تەرۆریستی ھاتنە ھەرێمێ.
دیار کر ژی، پێشتر ژی وان ھەر دو چەکداران ل تاخا شۆراوێ یا کەرکووکێ د ئەنجاما ئێرشەکا تەرۆریستی دە ئەفسەرەکی پۆلیس شەھید کرن. د بوویەرەکە دن دە ل تاخا پەنجا عەلی دە پۆلیسەک شەھید کرن.
د ئێریشا سێیەمین دە، وان چەکداران دو پۆلیسێن دن ل بازارا باژێر شەھید کرن. د کریارا چارەم دە، وان ئەفسەرەک پۆلیس ل بەر نەخوەشخانەیا کۆمارێ شەھید کرن و دەستێ وان د چەند کریارێن دن یێن تەرۆریستی دە ژی ھەبوو.
