“بێی گوھدانا بریارێن ناڤدەولەتی” ھلبژارتنێن پارلەمانتۆیا سووریەیێ تێ کرن

 ھلبژارتنێن پارلامەنتۆیا سووریەیێ ئیرۆ 15 تیرمەھێ  برێڤە دچن. ئالیێن کوردی بایکۆت کرنە و خەلکێ پارێزگەھا سوەیدایێ ژی سندۆقێن دەنگدانێ شەوتاندن.

ئالیێن سیاسی یێن ل رۆژئاڤایێ کوردستانێ ھلبژارتن بایکۆت کرنە، ل ناڤچەیێن د دەستێ ئۆپۆزیسیۆنێ دە پرۆسەیا ھلبژارتنان نایێ کرن، خەلکێ پارێزگەھا سوەیدایێ ژی سندۆقێن دەنگدانێ شەوتاندن.

ئەڤ ھلبژارتنن د دەمەکی دە نە کو پشتی دەرکەتنا شەر د سالا 2011 دە چ ئۆپۆزسیۆنا ب باندۆر د ھوندرێ سووریەیێ دە نینە و دەڤەرێن بەرفرەھ ل دەرڤەیی کۆنترۆلا رێژیمێ مانە.

ل رۆژئاڤایێ کوردستانێ گرنگی ب ھلبژاتنان نایێ دایین و گەلەک ئالی ڤان ھلبژارتنان بایکۆت دکن و ژبەر کو دبینن ئەڤ ھلبژارتن نە رەوانە و چ چارەسەریێ لگەل خوە نایینە.

ئەنجومەنا نشتیمانی یا کورد ل سووریێ (ئەنەکەسێ) د داخویانیەکێ دە ھلبژارتن بایکۆت کر و راگھاند، رێژیما سووریەیێ دخوازە ھلبژارتنان پێک بینە، وەک ھەولەکێ ژ بۆ دەستھلاتا خوە ب رێیا سازیەکە سەختە ب ھێز بکە. ئەڤ ھلبژارتن پشتگوھکرنا رێکەفتنا جڤاکا ناڤدەولەتی ل سەر بریارا 2254 نەتەوێن یەکبوویی ژ بۆ چارەسەرکرنا کریزا سووریێ یە.

ھەروھا گۆت: “ل گۆری بریارا 2254، دڤێت ھلبژارتن ل وەلات د رەوشەکە ئەولە، بێ ئالی و ئارام دە بێ لدارخستن، ھەروھا دڤێت ھلبژارتن پاک و دادپەروەر بن و ھەموو سووریێن ل ناڤخوە و دەرڤەیی وەلات تێ دە بەشدار ببن و د بن چاڤدێریا نەتەوێن یەکگرتی دە بن، کو چ مەرجەک ژ وێ ژی نینە.”

ژ ئالیێ خوە ڤە، مەجلسا سووریەیا دەمۆکراتیک (مەسەدە)ھلبژارتنێن پارلامەنتۆیا سووریەیێ بایکۆت کر و دیار کر کو دڤێت چارەسەریەکا گشتی ل گۆری بریارا ناڤدەولەتی (2254) پێک بێ.

ھەروھا مەسەدێ بانگ ل گەلێ سووریەیێ، تەڤاھی ھێزێن نیشتمانی و دەمۆکراتیک کر ژی کو بەشداری ھلبژارتنێن پارلامەنتۆیا سووریەیێ نەبن و گۆت: “ئەم گرینگیێ ددن چارەسەریا سیاسی یا گشتی یا ل گۆری بریارا ناڤدەولەتی 2254.”