رۆژنامەیەکە ترکیەیی ئامادەکاریێن جڤینا ناڤبەرا سەرۆککۆمارێن ترکیە و سووریەیێ ئەشکەرە کرنە و ئاماژە دایە کو، ئەو جڤین دێ ل مۆسکۆیێ ل ژێر چاڤدێریا پوتین بە و سەرۆکوەزیرێ ئیراقێ ژی دێ یەکانە ڤەخواندیێ وێ جڤینێ بە، لێ چاڤکانیەکێ ژ وەزارەتا دەرڤە یا ترکیەیێ ئەو زانیار رەد کرنە.
رۆژنامەیا ده‌یلی سه‌باح یا ترکیەیی پارڤە کریە، «هەڤدیتنا یەکێ یا ناڤبەرا سەرۆککۆمارێ ترکیەیێ رەجەپ تاییپ ئەردۆگان و سەرۆککۆمارێ سووریەیێ بەشار ئەسەد ژ دەما روودانێن ناڤخوەیی یێن سووریەیێ ل سالا 2011ێ ڤە دێ ل داویا مەها تەباخێ یان ژی دەستپێکا مەها ئیلۆنێ یا ئیسال بە».
وێ رۆژنامەیێ ئاماژە ژی دایە، «هەڤدیتنا یەکێ یا ناڤبەرا ئەردۆگان و ئەسەد دێ ل مۆسکۆیا پایتەختا رووسیایێ بە، ب ناڤبەینکاریا سەرۆکێ رووسیایێ ڤلادیمیر پۆتن، هەروەسا سەرۆکوەزیرێ ئیراقێ محەمەد شه‌یاع سوودانی ژی دێ بێ ڤەخواندن».
ده‌یلی سه‌باح ئەشکەرە ژی کریە کو، ژ بۆ هەڤدیتنا ناڤبەرا ئەردۆگان و ئەسەد نایێ چاڤەرێکرن کو چ بەرپرسەکی ئیرانێ بێ ڤەخواندن کو ل وێ جڤینێ ئامادە ببە.
ل بەرانبەری وێ یەکێ ژی، مەدیایا ترکیەیێ ژ چاڤکانیەکە وەزارەتا دەرڤە یا وەلاتێ خوە پارڤە کریە کو، ئەو زانیارێن بەحسا جڤینا ئەردۆگان و ئەسەد ل مۆسکۆیێ دکن راست نینن، بێ کو زانیارێن نوو ل سەر داوی پێشڤەچوونێن وێ هەڤدیتنێ ئەشکەرە بکە.
ئەڤ د دەمەکێ یە کو سەرۆککۆمارێ ترکیەیێ رەجەپ تاییپ ئەردۆگان بەری دو هەفتیان سەرۆککۆمارێ سووریەیێ بەشار ئەسەد ژ بۆ هەڤدیتنەکە تایبەت ڤەخواند و پێشنیار کر کو هەڤدیتنا وان ل ترکیەیێ یان ژی ل وەلاتێ سێیێ بە. ب وێ ڤەخواندنێ رە ژی، ئەردۆگان وەزیرێ دەرڤەیێ ترکیەیێ هاکان فیدان راسپارد کو ژ بۆ ئامادەکاریێن وێ هەڤدیتنێ کار بکە.
