سەرۆکوەزیرێ ئیراقێ د نڤیسارەکا فەرمی دە داخوازێ ژ وەزارەت و دەزگەھێن حکوومەتێ دکە کو د نڤیسارێن خوە یێن فەرمی دە پەکەکێ وەکە رێکخستنەکا قەدەغەکری بدن ناساندن.
سەرۆکوەزیرێ ئیراقێ و فەرماندەیێ گشتی یێ ھێزێن چەکدار محەمەد شیاع سوودانی د نڤیسارەکا فەرمی دە داخواز ژ وەزارەت، دەزگەھ و فەرمانگەھێن گرێدایی حکوومەتێ دکە کو، د داخویانی و نڤیسارێن خوەیێن فەرمی دە پەکەکێ وەکی رێکخستنەکا قەدەغەکری بدن ناساندن.
ئەو نڤیسار ل رۆژا 14/7/2024 ژ ئالیێ برێڤەبەرێ گشتی یێ فەرمانگەھا کارووبارێن کارگێری ل سکرتاریەتا گشتی یا جڤاتا وەزیرێن ئیراقێ فەلاح عەبوودی ڤە ژ بۆ نڤیسینگەھێن ھەر یەک ژ سەرۆکێ جڤاتا نوونەرێن ئیراقێ، جیگرێن وی یێن یەکێ و دویێ، بریاردێرێن جڤاتا نوونەران، سکێرتێرێ گشتی یێ جڤاتا نوونەران، جیگرێ سکرتێرێ گشتی ژ بۆ کارووبارێن کارگێری، شێورمەندێن جڤاتا نوونەران، فەرمانگەھێن گرێدایی سکرتاریەتا گشتی یا جڤاتا نوونەران و ھەر سێ پشکێن ھووربینی، ئەوەلەھی و پەیمانان ھاتیە ئاراستەکرن.
ئەڤ نڤیسار د دەمەکێ دەیە کو، ئارتێشا ترکیەیێ د چەند ھەفتیێن بۆری دە ئۆپەراسیۆنێن خوەیێن سەربازی ل دژی پەکەکێ ل سنۆرێ قەزایا ئامێدیێ گرانتر کرنە، و ژ بەر شەر و ئالۆزیێن ناڤبەرا ئارتێشا ترکیەیێ و پەکەکێ ھەژمارەکا وەلاتیێن سڤیل بوونە قوربانی و ھەژمارەکا دۆنەمێن ئەردێن گوندیان ژی ھاتن شەوتاندن.
ئالۆزیێن ناڤبەرا ترکیێ و پەکەکێ ژ سالا 1984 ھەتا نھا بەردەوامن. رێکخستنا پەکەکێ ژ ئالیێ ئیراق، ترکیێ، ئامەریکا و یەکیێتیا ئەورۆپایێ ڤە وەکی “رێکخستنەکا تەرۆرستی” ھاتیە ناساندن. ل دوو ئامارێن نەفەرمی ژی، ژ بەر شەر و ئالۆزیێن وێ زێدەتری 60 ھەزار کەسان ژ ھەر دو ئالیان ھاتنە کوشتن.
