ل مووسلێ گۆرەکێ ب کۆم هات دیتن

ل پارێزگەها مووسلێ گۆرەکێ ب کۆم کو تێ دە 14 کەسێن ژ ئالیێ داعشێ ڤە هاتبوون کوشتن، هات دیتن.

ل گۆری داخویانیا شانەیا راگهاندنێ یا هێزێن ئەولەهیێ یا ئیراقێ، ل ناڤچەیا تلله‌عفه‌رێ یا مووسلێ د دەما ڤەدانا هیمێ دبستانەکێ دە گۆرەکێ ب کۆم هات دیتن.

ل گۆری داخویانیێ، د گۆرا ب کۆم دە 14 تەرم هاتنە دیتن کو ک ئالیێ داعشێ ڤە هاتنە کوشتن.

هەروها د داخویانیێ دە هات دەستنیشانکرن کو ژ بۆ تەشخیسکرنێ هێزێن ئەولەهیێ تەرم رادەستی رایەدارێن پێوەندیدار کرنە.

ل گۆری ناڤەندا ستراتەژیکا مافێن مرۆڤان، ل ئیراقێ 216 گۆرێن ب کۆم هەنە، 130 ژ وان هاتنە کۆلاندن و 86 ژی نەهاتنە کۆلاندن. هەتا نها ژ وان گۆران 7 هەزار و 367 تەرم هاتنە دەرخستن.

2014ان داعشێ دویەمین باژارێ هەری مەزنێ ئیراقێ کۆنترۆل کر، پشتی کو داعشێ مووسل کۆنترۆل کری، ل شنگالێ ل هەمبەری کوردێن ئێزدی کۆمکوژی پێک ئانی.