مەدیایا ترکیەیێ ئەشکەرە کر، تێ چاڤەرێکرن کو د تەباخا بێ دە ھەڤدیتنا سەرۆککۆمارێ ترکیەیێ رەجەب تەییب ئەردۆگان و سەرۆکێ سووریەیێ بەشار ئەسەد بهێتە ئەنجامدان.
رۆژنامەیا “تورکیە” یا نێزیکی حکوومەتێ بەلاڤ کر، ل گۆری لھەڤکرنا سەرۆکێ ئیستخباراتا ترکیەیێ ئیبراھیم کالن و سەرۆکێ ئیستخباراتا دەرڤەیا رووسیایێ سێرجی ناریشکن، بریارە ھەڤدیتنا ئەردۆگان و ئەسەد ل دەریێ سینۆرییێ ئەل-کەسەبێ بهێتە ئەنجامدان.
وێ رۆژنامەیێ گۆت ژی، بەرپرسێن ترک و سووری د خزیرانا بۆری دە سێ گەرێن دانوستاندنان پێک ئانین، ژ بۆ ئامادەکرنا جڤینا ھەردو سەرۆکان، ئەڤ پێڤاژۆ بەر ب پێش ڤە دچە و دبە کو جڤین د تەباخا بێ دە ل دەریێ ئەل-کەسەبێ بهێتە ئەنجامدان.
ئەڤ د دەمەکێ دە یە، سەرۆککۆمارێ ترکیەیێ رەجەپ تەییب ئەردۆگان بەری دو ھەفتەیان سەرۆککۆمارێ سووریەیێ بەشار ئەسەد ژ بۆ ھەڤدیتنەکە تایبەت ڤەخواندبوو و پێشنیار کربوو کو ھەڤدیتنا وان ل ترکیەیێ یان ژی ل وەلاتێ سێیەم بە. ب وێ ڤەخواندنێ رە ژی، ئەردۆگان وەزیرێ دەرڤەیێ ترکیەیێ ھاکان فیدان راسپارت کو ژ بۆ ئامادەکاریێن وێ ھەڤدیتنێ کار بکە.
ئەنقەرەیێ پشتی شەرێ ل سووریەیێ د سالا 2011 دە، پێوەندیێن خوە لگەل شامێ قوت کرن و پشتگری دا ئۆپۆزیسیۆنا رەژیما ئەسەد. ئەردۆگان ژی ئەسەد وەک کوژەر بناڤ کربوو و داخوازا دادگەھکرنا وی ل دادگەھەکە ناڤدەولەتی کربوو.
