نێچیرڤان بارزانی بەشداری سۆندخوارنا سەرۆککۆمارێ نوویێ ئیرانێ دبه‌

سەرۆکێ هەرێما کوردستانێ نێچیرڤان بارزانی ژ بۆ بەشداری سۆندخوارنا سەرۆککۆمارێ نوویێ ئیرانێ مەسعوود پزیشکیان ببە گهیشت تەهرانا پایتەختا ئیرانێ.

سەرۆکێ هەرێما کوردستانێ نێچیرڤان بارزانی ل سەر ڤەخواندنەکە فەرمی چوو تەهرانێ.

نێچیرڤان بارزانی دێ ل گەل سەرکردە و بەرپرسێن وەلاتێن دن بەشداری سۆندخوارن و دەستبکارکرنا سەرۆککۆمارێ نوو یێ ئیرانێ مەسعوود پزیشکیان ببە.

ل گۆری دەستوورا ئیرانێ، سەرۆککۆمار بەلگەیا دەستبکارکرنێ رێبەرێ کۆمارا ئیسلامی یا ئیرانێ وەرگرت، مەراسیما سۆندخوارنێ دێ ب ئامادەبوونا سەرۆکێ دادگەها بلند، ئەندامێن ئەنجوومەنا پاراستنا دەستوورێ، سەرۆکێ دەستهلاتا دادوەریێ و بەرپرسێن دن یێن نشتیمانێ و لەشکەری ل پارلامەنتۆیا ئیرانێ بێ لدارخستن.

ل ئیرانێ 28ێ هەزیرانێ گەرا یەکەما هلبژارتنێن سەرۆککۆماریێ هاتبوو کرن و مەسعوود پزیشکیان و سەعید جەلیلی مابوون گەرا دویەم.

د گەرا دویەم دە مەسعوود پزیشکیان ب رێژەیا ژ سەدی 53،7ان بوو سەرۆککۆمارێ 9ەمێ ئیرانێ.

28ێ تیرمەهێ د دەما مەراسیما ئیمزەکرنا بەلگەیا دەستبکارنێ دە ژ ئالیێ رێبەرێ ئیرانێ عەلی خامینەیی ڤە مەسعوود پزیشکیان گۆتارەک پێشکێش کربوو و گۆتبوو:

«هەموو ئەو کەسێن کو دەنگ دانە من ئان رکابەرێ من، ئان ژی کەسێن کو ژ بەر رەخنە و گازنان بەشداری هلبژارتنان نەبوونە هێڤیا گوهەرینێ ژ من و حکوومەتا پاشەرۆژێ دکن دەما بەرسڤدایینێ ژ ئیرۆ ڤە دەست پێ دکە».