فرۆکەیێن شەری یێن ئیسرایلێ سەرکردەیەکی حزبولاھا لبنانی ل تاخا باشوورێ بەیرووتێ کرە ئارمانج.
ئاژانسا “رویتەرس” راگھاند، د ئەنجاما ئێریشەکا ئاسمانی ل سەر تاخا باشوورێ بەیرووتێ دە، سەرکردەیەکی پایەبلندێ حزبولاھێ ھاتیە ئارمانجکرن.
ھن ژێدەرێن مەدیایی یێن لبنانی گۆتن، گومان تێ کرن کو ئێریشێ حاج موحسن، کەسێ دویەمینێ حزبولاھێ کریە ئارمانج.
ژ ئالیێ خوە ڤە، ئارتێشا ئیسرایلێ د داخویانیەکێ دە راگھاند، وان “فەرماندارێ بەرپرسێ کوشتنا زارۆکان ل مەجدەل شەمسێ و کوشتنا گەلەک سڤیلێن ئیسرایلێ، کریە ئارمانج.”
مەدیایا ئیسرایلێ ژی راگھاند، ئارتێشا ئیسرایلێ ژ بۆ ئەگەرا ھەر بەرسڤەکا حزبولاھێ ل ھەمبەر ئێریشا ل سەر تاخا باشوورێ بەیرووتێ، کەتیە رەوشا ئامادەباشیێ.
ئەڤ ئێریش پشتی وێ تێ، ئامەریکا و ئەورۆپا بەری چەند رۆژان ژ وەلاتیێن خوە داخواز کربوون کو ژ بەر گەشەدانێن نوویێن د ناڤبەرا ئیسرایل و حزبولاھێ دە، د زووترین دەم دە ژ لبنانێ دەرکەڤن یان ژی خوە ئامادە بکن کو ژ بۆ دەمەکە درێژ بمینن.
