رۆژنامەیەکا ئامەریکایی ژ ھەفت چاڤکانیێن ھایدار پارڤە کریە، کوشتنا ئیسماعیل ھەنیە ب رێیا بۆمبەیەکێ بوویە کو پێشتر ئیسرائیلێ دەربازی تەھرانێ و جھێ مانا ھەنیە کریە.
رۆژنامەیا نیو یۆرک تایمسێ د راپۆرتەکێ دە ئەشکەرە کریە، ئەو بۆمبە بەری نێزی دو مەھان ل جھێ مانا ئیسماعیل ھەنیە ھاتیە ڤەشارتن، تەڤی کو ژ ئالیێ ئارتێشا پاسدارێن ئیرانێ ڤە زێرەڤانی ل وێ مێڤانخانەیێ دھات کرن و بەشکەکی مەزنە ژ کۆمەلگەھەکا مەزن ب ناڤێ نەشەت ل تاخەکی باکورێ تەھرانێ.
ئیسماعیل ھەنیە ژ بۆ تەڤلیبوونا د مەراسیمێن سۆندخوارن و دەستپێکرنا کاری یا سەرۆککۆمارێ ئیرانێ یێ نوو ل تەھرانێ بوو، کو ل گۆر چاڤکانیێن نیو یۆرک تایمسێ، ئەو بۆمبە ژ دوور ڤە ھاتیە تەقاندن، پشتی پشتراست بوونە کو ھەنیە ل ئۆدەیا خوە بوویە، د ئەنجامێ دە ژی ئەو و زێرەڤانێ خوەیێ تایبەت ھاتنە کوشتن.
ل گر زانیاریێن کو ژ بەرپرسێن بلند یێن ئیران و ئارتێشا پاسداران ھاتنە بەلاڤکرن، تەقینا وێ بۆمبەیێ ئەو ئاڤاھی ھەژاندیە و ھەژمارەکا پەنجەرێن وێ شکاندنە و بوویە سەدەما ھەرفینا بەشەکی دیوارەکی دەرڤەیێ وێ مێڤانخانەیێ، کو ئەو زرار د وی وێنەیی دە ژی ب هەمان ئاوایی دیار بوونە یێ کو نیو یۆرک تایمس بەلاڤ کریە.
وێ رۆژنامەیێ ئاماژە ژی دایە، پێشتر ھەنیە د دەما سەردانێن خوە یێن ژ بۆ تەھرانێ دە چەند جاران ل وێ مێڤانخانەیێ مایە. ڤێ یەکێ ژی وەسا کریە کو بکارن بۆمبەیەکێ ل وێ ئۆدەیێ دانن و ژ بۆ دەما چەند ھەفتیان ڤەشارتی بھێلن.
چاڤکانیێن نیو یۆرک تایمسێ تەکەز ژی کریە کو، پلانا کوشتنا ئیسماعیل ھەنیە چەند مەھان ڤەکێشایە و چاڤدێریەکا بەرفرەھ ل وێ کۆمەلگەھێ ھاتیە کرن.
وێ رۆژنامەیا ئامەریکایی رۆن ژی کر، وێ تەقینێ زرار گەھاندنە ئاڤاھیێ وێ کۆمەلگەھێ، کو بوویە سەدەما شکاندنا پەنجەران و ھەرفینا دیوارەکی وێ. ئەڤ ژی دیار دکە کو ئەگەر ئەو تەقین ب رێیا مۆشەکان با، قەبارەیێ زراران دا گەلەک مەزنتر بە.
وێ چاڤکانیێ ھەروەسا ئەشکەرە کریە، ئۆدەیا رێبەرێ بزاڤا جیھادی یا ئیسلامی یا فلستینێ زیاد نەخلا نێزیکی جھێ وێ روودانێ بوو و زرارەکا وەسا نەگەھشتیە وی، ئەڤ ژی وەسا شرۆڤە کریە کو پلانا کوشتنا ھەنیە ب ھووری ھاتیە دارێتن.
