سەرۆک بارزانی د 10 سالیا جینۆسایدا کوردێن ئێزدی دە ب پێویست زانی کو داوی ل رەوشا نەیاسایی و نەئاسایی وەرە کو ئەڤ 10 سالن ب نەحەقی ل سەر خەلکێ شنگالێ ھاتیە سەپاندن.”
سەرۆک مەسعوود بارزانی ئیرۆ 3 تیرمەھێ ب بۆنەیا 10 سالیا جینۆسایدا کوردێن ئێزدی پەیامەک بەلاڤ کر و تێ دە راگھاند، “جینۆسایدا شنگالێ و تاوانێن کو تەرۆریستێن داعشێ بەریا دەھ سالان ل ھەمبەر خوشک و برایێن مەیێن ئێزدی پێک ئانین، برینەکە ل سەر بەدەنا گەلێ کوردستانێ. ئەڤ تاوان، ھەڤشێوە و بەردەوامیا وان جینۆساید، قرکرن و تاوانانە یێن کو د دیرۆکێ دە ل دژی گەلێ کوردستانێ ھاتنە کرن. خوشک و برایێن مەیێن ئێزدی ژ بەر کوردبوون و باوەریێن خوە یێن ئۆلی، راستی کین و ھۆڤیتیا تاوانبارێن داعشێ ھاتن.”
سەرۆک بارزانی گۆت: “د دەھەمین سالڤەگەرا ڤێ کارەساتێ دە، سلاڤ ل گیانێ شەھید و قوربانیێن ڤێ تاوانێ و سلاڤ ل گیانێ وان پێشمەرگەیێن قەھرەمان یێن کو خوینا خوە ژ بۆ شکاندنا دۆرپێچا چیایێ شنگالێ و ئازادکرنا شنگالێ بەخشی و سەرێ داعشا ھۆڤ خستن بن لنگێن خوشک و برایێن مەیێن ئێزدی و تۆلا وێ نەحەقی و زۆلمێ ل تەرۆریستان ھلدان.”
ھەروھا گۆت: “د ڤێ بیرئانینا خەمگین دە، ئەم تەکەز دکن کو ئەم ب ھەموو ھێزا خوە پشتەڤانیا ماف و داخوازێن خوشک و برایێن ئێزدی و شێنیێن دەڤەرا شنگالێ دکن.”
سەرۆک بارزانی تەکەز کر: “پێویستە رێکەفتنا د ناڤبەرا حکوومەتا ھەرێما کوردستانێ و حکوومەتا ئیراقا فەدەرال دە، ژ بۆ ئاساییکرنا رەوشا شنگالێ بهێتە جیبجیکرن و رەوشا نەیاسایی و ئاوارتەیا کو ئەڤ دەھ سالن ب نەحەقی ل سەر گەلێ ھەرێمێ ھاتیە فەرزکرن، ب داوی ببە. دڤێت داوی ل وێ یەکێ وەرە کو، ژان و ئازارێن شنگالێ ژ بۆ مەبەستێن سیاسی، خوەفەرزکرن و ئالۆزکرنا رەوشا شەنگالێ بکار بینن، دڤێت خوشک و برایێن مەیێن ئێزدی ڤەگەرن مالێن خوە و د ناڤا ئاشتی و ئارامیێ دە بژین.”
