حزبوللاها لبنانی راگهاند، وێ جەلیلێ ژۆرین ب دەهان مووشەکێن کاتیوشا کرە ئارمانج، وەک بەرسڤەکێ ل سەر بۆمبەبارانا ئیسرائیلی کو د ئەنجامێ دە سڤیل ل باشوورێ لبنانێ بریندار بوون.
حزبوللاهێ د داخویانیا خوە دە گۆت، «ل هەمبەر ئێریشێن ئیسرائیلا دژمنكاری ل سەر گوندێن باشوورێ لبنانێ، ب تایبەتی ئێریشێن ل سەر گوندێن کەفەر کلا و دێر سریان و بریندارکرنا سڤیلان» وان هەرێمەکە نوو «بەیت هێلل» ب دەهان مووشەکێن کاتیوشا بۆمبەباران کر.
ژ ئالیێ خوە ڤە ئارتێشا ئیسرائیلی راگهاند، دۆرا 30 مووشەکان ژ لبنانێ بەر ب جەلیلێ ژۆرین ڤە هاتنە ئاڤێتن. دیار کر ژی، بەرەڤانیا ئاسمانی پرانیا مووشەکان تێک برن و یەک ژ وان مووشەکان ل بەیت هێلل کەت، بێیی کو ت زیان چێببە.
ژ ئالیێ خوە ڤە، ئاژانسا نشتمانی یا نووچەیانا لبنانێ شەڤا بۆری راگهاند، 4 ئێریشێن ل پەی هەڤ ل سەر ناڤچەیێن باشوورێ وەلات هاتنە کرن.
ئەڤ یەک د دەمەکێ دەیە، جیهان ل بەندا بەرسڤەکە لەشکەری یا ئیران و حزبوللاهێ ل سەر ئیسرائیلێ یە، پشتی کوشتنا سەرۆکێ پۆلیتبورۆیا حەماسێ ئیسماعیل هەنیە رۆژا چارشەمێ ل تەهرانێ و کوشتنا سەرکردەیەکی ناڤدارێ حزبوللاهێ فوئاد شوکر ل تاخا باشوورا بەیرووتێ ئێڤارا سێشەمێ.
