یەک ژ پەرلەمانتەرێن حەشدا شەعبی کو د هەمان دەم دە بەرپرسەکی لەشکەری یێ سەر ب حەشدا شەعبی یە، هەیانی نها 1 ملیار دینار خەرج کرینە هەیا کو بکارە کاندیدێ خوە بکە برێڤەبەرێ ناحیەیا بەعشیقە.
چاڤکانیێن تایبەت یێن پێگەها دارکا مازی ئەشکەرە کرن، وەعد قەدۆ پەرلەمانتەرێ عیراقێ یەک ملیار دینار خەرج کرینە هەیانی بکاربە “فوئاد ئەحمەد یووسف عەلی ئەل-ئاغا” کاندیدێ لیوایا 30 یا حەشدا شەعبی ژ ئالیێ ئەنجوومەنا پارێزگەها نەینەوایێ ڤە وەکە برێڤەبەرێ ناحیەیا بەعشیقە وەرە دەستنیشانکرن.
چاڤکانیێن دارکا مازی تەکەز کرن، ئەڤ یەک د دەمەکی دە یە کو پێش نها فوئاد یووسف ب تاوانا دەست دانینە سەر پارچەکا ئەردی ب ئاوایەکی نەقانوونی ل باژارۆکێ بەعشیقە، ژ ئالیێ فەرمانگەها ئەملاکێن نەینەوایێ ڤە سکالا ل سەر هاتبوو تۆمارکرن و د رۆژا 30/1/2024 دە ژ ئالیێ سەرۆکاتیا دادگەها تەمیزێ یا نەینەوایێ ڤە ل گۆر یاسایا ئیراقێ یا ژمارە 475 بریارا زیندانکرنێ بۆ دەما سالەکێ بۆ هاتبوو دەرکرن، لێ بەلێ هەیانی نها ئەڤ بریارە نەهاتیە جیبجیکرن.
گەلۆ وەعد قەدۆ کییە؟
وەعد قەدۆ یەک ژ پەرلەمانتەرێن ئیراقێ یە کو د هەمان دەم دە ئامر لیوایێ لیوایا 30 یا حەشدا شەعبی یە، د سالا 1971 دە ل مووسلێ ژ داییک بوویە، ب ئەبو جەعفەر ئەل-شەبەکی تێ ناسکرن، برایێ حەنین قەدۆ پەرلەمانتەرێ ئیراقێ یە، د سالا 2015 دە ژ ئەلمانیایێ ڤەگەریایە ئیراقێ، بەرپرسێ لیوایا 30 یا حەشدا شەعبی یە، ل سەر لیستا دەولەتا یاسا یا نۆری مالکی کاندید بوویە و بوویە پەرلەمانتەر، د سالا 2019 دە د ناڤا کەسێن د لیستەیا رەش یا ئامەریکایێ دە جی گرتیە.
