ئالیکارێ وەزیرێ بازرگانیێ یێ ئامەریکایێ ماتیۆ ئاكسێلرۆد راگهاند کو وان دەربارێ بازرگانیا ب رووسیایێ رە هشیاری دایە ترکیێ و ئەگەر ترکیە هەلوەستا خوە نەگوهەرە دێ وەرە جەزاکرن.
ماتیۆ ئاكسێلرۆد دەربارێ جەزایێن ب سەر رووسیایێ دە هاتنە سەپاندن ژ رۆژنامەیا فاینانشیال تایمز رە ئاخڤی.
ئالیکارێ وەزیرێ بازرگانیێ یێ ئامەریکایێ ماتیۆ ئاكسێلرۆد گۆت: مە ژ بۆ هنارتنا کەلوپەلێن ئەلەکترۆنیک یێن ئامەریکایێ، ب تایبەتی یێن ژ بۆ بەرهەمئانینا چەکان تێن بکارئانین هشیاری دابوو ترکیێ. لێ ترکیێ گوهـ نەدا هشیاریا مە. ئەگەر ئەم ڤێ یەکێ ب ئاوایەکی زەلال نەبینن ئەم دێ ژ نەچاری جەزایان ب سەر وان دە بسەپینن.
هه‌ر وها گۆت کو ژ بۆ راوەستاندنا هناردەیێ د رۆژێن داوی دە ل ئەنقەرە و ستەنبۆلێ ب بەرپرسێن ترکیێ رە هەڤدیتن کرنە و وان داخوازا تەدبیرێن توندتر کریە.
ئالیکارێ وەزیرێ بازرگانیێ یێ ئامەریکایێ هەروها گۆت: ژ بۆ کو تەکنۆلۆژیا ئامەریکایێ ب ئاوایەکی نەیاسایی نەچە رووسیایێ پێویستیا مە ب ئالیکاریا ترکیێ هەیە. دڤێ ئەم ببینن کو بەرپرسێن ترکیێ و پیشەسازیا وان د ڤێ مژارێ دە هنەک گاڤان باڤێژە. ئەگەر بەرۆڤاژی ببە ژ بلی سەپاندنا جەزایێن جور ب جور ت بژاردەیەکە مە نینە.
ل گۆری ئامارێن وەزارەتا بازرگانیێ یا ئامەریکایێ پشتی چینێ هەری زێدە ترکیە بەرهەمێن ئەلەکترۆنیکێن ئامەریکایێ هناردەیی رووسیایێ دکە.
ژ ئالیێ دن ڤە وەزارەتا بازرگانیێ یا ئامەریکایێ ژ بەر بازرگانیا ب رووسیایێ رە هەتا نها ب سەر 18 کۆمپانیایێن ترکیێ دە جەزا سەپاندنە.
وەزارەتا خەزینەیێ یا ئامەریکایێ ژی ژ بەر بازرگانیا ب رووسیێ رە ب سەر هەژمارەکە زێدە یا کۆمپانیایێن ترکیێ دە جەزا سەپاندنە.
