رۆژنامەیا “تەلەگراف” یا بریتانی راگھاند، سوپایێ پاسدارێن ئیرانێ فشار ل سەر سەرۆکێ ئیرانێ مەسعوود پزیشکیان زێدە کرنە، دا کو ئێریشی تەلئەڤیڤێ بکە. لێ پزیشکیان پێشنیار کریە کو ل شوونا ئێرشێن راستەراست ل سەر خاکا ئیسرایلێ، ئێریش ل سەر بنگەھێن ئیسرایلێ یێن ل وەلاتێن جیران بێن کرن.
رۆژنامەیا “تەلەگراف” راگھاند، سەرۆکێ نوویێ ئیرانێ مەسعوود پزیشکیان داخواز ژ سوپایێ پاسداران کریە، کو ل شوونا ئیسرایلێ، ئەر ئێرشی بنگەھێن ئیسرایلێ یێن ل وەلاتێن جیران بکن، دا کو رێ ل بەر شەرەکی بەرفرەھ بگرە. لێ ب شەرتێ کو ئەو وەلاتێن جیران بەریا ئێریشان بێن ئاگاھدارکرن.
رۆژنامەیا بریتانی ل سەر زارێ چەند ژێدەران بەلاڤ کریە، ناکۆکیەکا توند د ناڤبەرا سەرۆککۆمارێ نوویێ ئیرانێ و بەرپرسێن پلەبلندێن سوپایێ پاسداران دە، ل سەر چاوانیا بەرسڤدانا ئیسرایلێ و تۆلھلدانا کوشتنا سەرۆکێ پۆلیتبورۆیا حەماسێ ئیسماعیل ھەنیە ل تەھرانێ ھەیە.
ل گۆری رۆژنامەیێ، فەرماندارێن سوپایێ پاسداران ب نیازن کو راستەراست ئێرشی تەل ئەڤیڤێ و باژارێن دن یێن ئیسرایلێ بکن، لێ پزیشکیێن پێشنیار بۆ وان کریە کو ل شوونا ئێرشێن راستەراست، باشترە کو بارەگەھێن ئیسرایلی ل وەلاتێن جیران بکن ئارمانج.
ژێدەرەکی نێزیکی سەرۆکۆمارێ نوویێ ئیرانێ ژ بۆ “تەلەگرافێ” گۆت: “پزیشکیان ژ ھەر ئێریشەکا راستەراست ل سەر ئیسرایلێ نیگەرانە. ب باوەریا وی، کو ئیران ب شەنس بوو کو پشتی ئێریشێن ئیرانێ یێن ل سەر ئیسرایلێ د 13 نیسانا بۆری دە، نەکەتە شەرەکی راستەراست لگەل ئیسرایلێ، لەورا گارانتی نینە کو ھەمان چارەنڤیس دوبارە ببە.”
ل گۆر ژێدەرێن ژ رەوشا ناڤخوەیی یا ئیرانێ ئاگاھدارن، سوپایێ پاسدارێن ئیرانێ تەکەزی ل سەر ئێریشا راستەراست ل سەر ئیسرایل دکە، کو ئەڤ ژی وەک ھەولا لاوازکرنا سەرۆکۆمارێ نوو تێ دیتن، کو بریارا داوی دەربارێ چاوانیا تۆلھلدانێ دە، ژ ئالیێ رێبەرێ بلند ڤە تێ دایین.
سوپایێ پاسدارێن ئیرانێ ب ھنجەتا ھەبوونا بنکەیا مۆسادا ئیسرایلێ، دو جاران ب مووشەکان ئێریشی مالێن بازرگانێن ھەرێما کوردستانێ کریە. جارا یەکەم: شەڤا 13 ئادارا 2022، ئیرانێ ب مووشەکان ئێریشی مالا شێخ باز بەرزنجی ل ھەولێرێ کر، کو تەنێ زیانێن مادی ژێ دەرکەتن.
جارا دویەم ژی، ئیرانێ شەڤا 15 چلەیا 2024، ب مووشەکان ئێریشی مالا پێشرەو دزەیی کر، کو د ئەنجامێ دە ئەو، کەچا وی یا یەک سالی، کارسازەکی کریستیان و کارمەندەکا فیلیپینی ھاتن کوشتن.
لێ د ھەر دو ئێریشان دە، کۆمیتەیا لێگەرینا راستیان یا ئیراقی یا ب سەرۆکاتیا شێورمەندێ ئاسایشا نیشتیمانی قاسم ئەل-ئەعرەجی گۆت، ئەو خانی مالێن وەلاتیێن ئاسایی نە و گۆتەگۆتێن کو دبێژن ئەو بارەگەھێن مۆسادێن ئیسرایلێ نە، رەد کرن.
