وەزیرێ دەرڤەیێ ئیراقێ راگھاند، چ پەیمان لگەل ترکیەیێ چێنەبوویە کو دەستوورێ بدە وێ ئێریشێ و ئۆپەراسیۆنەکا لەشکەری ل ناڤا ئاخا ئیراقێ بکە.
وەزیرێ دەرڤەیێ ئیراقێ فوئاد حوسێن د ھەڤدیتنەکێ دە لگەل تەلەفزیۆنەکا ئیراقی دە، رەد کر کو بەغدا و ئەنقەرەیێ چ پەیمانەک ل سەر کەتنا ھێزێن ترکیەیێ بۆ ناڤ ئیراقێ کربن.
فوئاد حوسێن گۆت: “تشتێ کو ھەیە، تەنێ یاداشتنامەیەکا ھەڤتێگھیشتنێ یە، نە پەیمانەکە، کو ڤەدگەرە دەستپێکا سالێن ھەشتێیێ سەدسالا بۆری، د دەما رێژیما بەعس دە.”
ئاشکەرە کر ژی: “وەزیرێ دەرڤەیێ ئیراقێ یێ وێ سەردەمێ و وەزیرێ دەرڤەیێ ترکیەیێ رەشنڤیسا ھەڤتێگھیشتنەکێ ئیمزە کرن. ل گۆری وێ، دبە کو ئالیێ ترکیەیێ بۆ ھەیاما 72 دەمژمێران ل سەر ئاخا ئیراقێ ب کووراھیا 5 کم ئۆپەراسیۆنەکێ پێک بینە، ب شەرتێ کو بەریا ئۆپەراسیۆنێ ئالیێ ئیراقێ ئاگاھدار بکە.”
ھەروھا گۆت: “تشتێ کو ھاتیە کرن تەنێ ژ بۆ سالەکێ بوو، لەوما چ پەیمانەک د ناڤبەرا ئیراق و ترکیەیێ دە نینە. لێ تشتا کو نھا دقەومە ئەوە، ترکیە داخوازە رێ ل بەر چالاکیێن چەکداری یێن پەکەکێ، کو پارتیەکا ترکیەیێ یە، ل ناڤچەیێن سینۆری بگرە.
ئارتێشا ترکیەیێ ژ 18 نیسانا 2022 ڤە ل ناڤچەیێن سینۆری یێن ھەرێما کوردستانێ دەست ب پەراسیۆنا “پەنجە-کلیت” کریە و د دەما داوی دە ئۆپەراسیۆنێن خوە توندتر کرن.
پێشتر وەزیرێ دەرڤەیێ ترکیەیێ ھاکان فیدان راگھاندبوو، د شەرێ ل دژی پەکەکێ دە، ھەڤاھەنگیا ترکیەیێ لگەل حکوومەتا ئیراقێ ھەیە. ئیراق ژ بۆ وان گرینگە و ئەو دخوازن لگەل بەغدایێ شەرێ پەکەکێ بکن.
