ب سەردانا شاندەکا بلندا ئیراقێ یا ب سەرۆکاتیا جیگرێ سەرۆکوەزیر و وەزیرێ دەرڤەیێ ئیراقێ فوئاد حسێن و بەشداریا وەزیرێ ناڤخوەیێ ھەرێما کوردستانێ رێبەر ئەحمەد، رێکەفتنا ھەڤکاریا سەربازی، ئەولەکاری و شەرێ دژی تەرۆرێ د ناڤبەرا ترکیێ و ئیراقێ دە ھاتە ئیمزەکرن. وەزیرێن دەرڤە یێن ترکیێ و ئیراقێ رێکەفتنێ ب دیرۆکی ب ناڤ دکن. ب رێکەفتنێ ترکیە بنگەھا سەربازی یا بەعشیقە رادەستی ھێزێن ئیراقی دکە و بۆ رەوشا ئەولەکاریێ ل ئەنقەرە و بەغدایێ دو ناڤەندێن ھەماھەنگیێ تێن دامەزراندن.
شاندەکا بلندا ب سەرۆکاتیا وەزیرێ دەرڤەیێ ئیراقێ فوئاد حسێن، وەزیرێ ناڤخوەیێ ھەرێما کوردستانێ رێبەر ئەحمەد و وەزیرێ بەرگری و سەرۆکێ ھەوالگێریا ئیراقێ سەردانا ترکیێ کرن. د سەردانێ دە رێکەفتنا ھەڤکاریا سەربازی، ئەولەکاری و شەرێ تەرۆرێ ھاتە ئیمزەکرن. وەزیرێن دەرڤە یێن ئیراق و ترکیێ رێکەفتن ب رێکەفتنەکا دیرۆکی بناڤ دکن.
ناڤەندا ھەماھەنگیا سەربازی و ئەولەکاریا ھەڤبەش میکانیزمەکا ئەولەکارییا ئاستا بلندە کو ژ وەزیرێن دەرڤەیێن ئیراق و ترکیێ، وەزیرێن بەرگری و سەرۆکێن رێخستنێن ھەوالگێریا ڤان ئالیان پێک تێ.
د چارچۆڤەیا رێکەفتنا شەرێ دژی تەرۆرێ و ھەڤکاریێن ئەولەکاریێ دە، ل ئیراق و ترکیێ دو ناڤەند تێن ئیمزەکرن کو یەک ژ وان ل بەغدا، یەک ژ وان ژی ل ئەنقەرێ دبە.
ب بریارا نوو ترکیە بنگەھا سەربازی یا باشیقا پشتی نەھ سالان رادەستی بەغدایێ دکە و ل وێ دەرێ ناڤەندا ھەڤکاری و راھێنانێن ھەڤبەش تێ دروستکرن. ب بریارێ رە ھەڤکاریێن ئەولەکاری و شەرێ دژی تەرۆرێ دگھە ئاستەکە بلند.
وەزیرێ دەرڤەیێ ترکیێ ھاکان فیدان، رێکەفتن ب دیرۆکی بناڤ کر و گۆت لگەل رێکەفتنێ دێ گاڤێن کرداری ل دژی پەکەکێ ل مەیدانێ بێن ئاڤێتن. ھەر وھا ئەو دێ ھەڤکاریێن خوە بگھینن ئاستا بلند. فیدان ژ ھێلا ئیراقێ ڤە بناڤکرنا پەکەکێ وەک رێخستنا قەدەغەکری ب گاڤەکا پێش دنرخینە، ھەروھا داخستنا سێ پارتیێن نێزیکی پەکەکێ ژ ھێلا دادگەھا ئیراقێ ڤە ب ئەرێنی پێشوازی دکە و دبێژە، ئەو ژ ئیراقێ دخوازن پەکەکێ وەک رێخستنا تەرۆرێ بناڤ بکن.
وەزیرێ دەرڤەیێ ئیراقێ فوئاد حسێن ژی راگھاند، د ناڤبەرا ئیراق و ترکیێ دە یەکەم جارە رێکەفتنەکا ئەوقاس گرینگ تێ ئیمزەکرن. حسێن دبێژە، رێکەفتن ھەڤدەم؛ شەرێ ل دژی بازرگانیا مرۆڤان، مادەیێن ھشبر و رێخستنێن تاوانێ یێن ناڤبەرا وەلاتان ژی ل خوە دگرە. فوئاد حسێن ژی داخستنا سێ پارتیێن نێزیکی پەکەکێ ببیر دخە و دبێژە: بەغدا رێ نادە پەکەکێ و رێخستنێن گرێدایی پەکەکێ بۆ ئیراق و پرۆسەیا دەمۆکراسیێ وەک گەف بناڤ کرن.
سەرۆککۆمارێ ترکیێ رەجەب تەییب ئەردۆگان؛ 22 نیسانا 2024، تەڤی ھەژمارەکا زێدە وەزیرێن کابینەیا خوە سەردانا بەغدایێ کربوو. پشتی سەردانێ د وارێن ئابۆری، ئەولەکاری، بازرگانی، ئاڤ و ئەنەرژی و ئەلەکتریک و ڤەگوھاستنێ دە ب گشتی 27 گرێبەست ھاتبوون ئیمزەکرن. سەردانا ئەردۆگان بۆ بەغدا و ھەولێرێ پشتی 12 سالان کارڤەدانێن مەزن ل پەی خوە ئانیبوون.
