بریارە وەزیرێ دەرڤەیێ ئامەریکایێ ئانتۆنی بلنکن ژ بۆ گۆتوبێژکرنا ئاگربەستا ل کەرتا غەززەیێ، ئیرۆ بگھە رۆژھلاتا ناڤین.
ئەڤ دەهەمین سەرەدانا بلنکن بۆ رۆژھلاتا ناڤینە، ژ بۆ سەرخستنا ھەولێن دیپلۆماتیکێن وەلاتێ خوە ژ بۆ گھەشتنا ب ئاگربەستێ ل کەرتا غەززەیێ و بداویانینا شەرێ کو زێدەتر ژ 10 مەھان بەردەوامە.
کاربدەستێن ئامەریکی ھەر چەندە رەد ناکن کو ژ بۆ بداویکرنا شەرێ غەززەیێ، ھین گەلەک کار مایە، لێ د ھەمان دەمێ دە، ئەو گەشبینیا خوە ژ بۆ رێکەفتنا ئاگربەستێ ڤەناشێرن، ب تایبەت ل بەر رۆناھیا گۆتوبێژێن کو د رۆژێن داوی دە ل دەوحەیا قەتەرێ ھاتن کرن.
ئاژانسا “رویتەرس” بەلاڤ کر: “تێ پایین بلنکن ل تەل ئەڤیڤێ لگەل سەرۆکوەزیرێ ئیسرایلێ بەنیامن نەتانیاھو و رایەدارێن دنێن پایەبلند بجڤە. “
تەڤی کو بریار بوو بلنکن ھەفتەیا بۆری سەردانا رۆژھلاتا ناڤین بکە، لێ گەرا وی ژ بۆ ڤێ ھەفتەیێ ھاتە پاشخستن و بریارە بلنکن گەرەکا دن یا دانوستاندنێن ئاگربەستێ د ناڤبەرا ئیسرایل و حەماسێ دە، ل قاھیرەیێ لگەل رایەدارێن ھەرێمێ ھەڤدیتنان پێک بینە.
تێ پلانکرن کو ھەڤدیتنێن ئاگربەستا غەززەیێ ڤێ ھەفتەیێ ژی بدۆمن و ھەڤدیتن ژ دەوحەیێ بەر ب قاھیرەیێ ڤە بچن.
وەزیرێن دەرڤەیێن بریتانیا، فرانسا، ئالمانیا و ئیتالیا ژی د داخویانیەکە ھەڤبەش دە، پشتەڤانیا خوە ژ سەرخستنا گۆتوبێژێن ئاگربەستێ نیشان دان و بانگ ل ھەموو ئالیان کرن کو خوە ژ کریارێن کو رەوشێ ئالۆزتر دکن بدوور بخن.
