بارینا بارانێن توند ل باژارێن ترکیێ یێن کرشەھر، نەڤشەھیر و کایسەری بوو سەدەما رابوونا لەھیان. ھەروەھا ل سەر رێ و شەقامان ئاڤ کۆمبوو و ل باژارێ کرشەھیرێ ترکیێ شڤانەک ل بەر لەھیێ کەت و ژیانا خوە ژ دەست دا، ھەروەھا ل باژارێ کایسەری ژی کەسەک ب ئۆتۆمۆبیلا خوە ڤە ل بەر لەھیێ کەت ژیانا خوە ژ دەست دا و 40 کەسێن ژ بەر لەھیێ ئاسێ مابوون ھاتن رزگارکرن.
ل گوندێ ئوزون ئال یێ سەر ب باژارێ کرشەھرێ ترکیێ بارانەکا توند باری و بوو سەدەما لەھیێ. گەلەک باخ و باخچە د بن لەھیێ دە مان و شڤانێ ب ناڤێ موستەفا ئاکار بەر لەھیێ کەت و ب خەباتێن تیمێن بەرگریا شارستانی ڤە تەرمێ وی 4 کیلۆمەترەیان دووری جیھێ کو لێ وندا بوویی ھاتە دیتن.
ل تاخا گوڵوجەیا سەر ب ناڤچەیا بونیانا گرێدایی پارێزگەھا کایسەری ژی لەھی پێکھات و گەلەک مال د بن ئاڤێ دە مان و ھات راگەھاندن کەسەک ل بەر لەھیێ کەتیە و وندا بوویە.
پشتی بوویەرێ تیمێن ئافاد، ئومکە، ژاک، ئاگرکوژ خەباتێن لێگەرین و رزگارکرنێ دان دەستپێ کرن و تەرمێ کەسێ ب ناڤێ موھیتین ساراچ ھات دیتن.
ھەروەھا ژ بەر لەھیێ 40 کەس د مالێن خوە و د ئۆتۆمۆبیل و وەساییتێن خوە دە ئاسێ مابوون ھاتن رزگارکرن.
ل بەلدەیا گۆرەمەیا سەر ب ناڤەندا باژارێ نەڤشەھیر ژی بارینا بارانێن توند بوو سەدەمێ لەھیێ و ژیانا رۆژانە دە گەلەک ئاستەنگی چێکرن.
ھات راگەھاندن گەلەک رێ و شەقام د بن ئاڤێ دە مان و ژ بەر ھاتنا خوارێ یا زناران گەلەک ئۆتۆمۆبیل د بن وان زنارێن ژ جیھێ گەشتیاری یێ پەری باجالاریێ ھاتن خوارێ دە زیان دیتن.
