د ئەنجاما ئێرشا مووشەکی یا ئیسرایلێ ل سەر ھەژمارەک جھێن دەردۆرا باژارێ مسیافێ ل پارێزگەھا حەمایێ دە، 5 سڤیلان جانێ خوە ژدەست دان.
ژێدەرەکی لەشکەری ژ ئاژانسا “سانا” رە راگھاند: شەڤا بۆری دەمژمێر 23:20 ئیسرایلێ ژ ئالیێ باکورێ رۆژئاڤایێ لبنانێ ڤە ئێریشەک ئاسمانی ل سەر ھەژمارەکە خالێن لەشکەری یێن ل ناڤەراستا سووریەیێ پێک ئانی.
وی ژێدەرێ لەشکەری ئاماژە ب وێ ژی، سیستەما بەرەڤانیا ئاسمانی یا سووریەیێ رووبروویی ئێریشا ئیسرایلێ بوو و ھەژمارەک مووشەک خستن خوارێ.
رێڤەبرێ نەخوەشخانەیا نشتمانییا ماسیافێ در. فەیسەل حەیدەر ژ سانا رە راگھاند، ئێرشێن ئیسرایلێ بوونە سەدەما کوشتنا 5 سڤیلان و برینداربوونا 19 کەسێن دن، کو رەوشا ھندەک ژ وان گرانە.
ژ ئالیەکی دن ڤە، رەوانگەھا سووری بۆ مافێن مرۆڤان گۆت، ئیسرایلێ شەڤا بۆری 4 ئێریشێن ئاسمانی ل دژی خالێن لەشکەری یێن ئارتێشا سووریەیێ ل پارێزگەھا حەمایێ پێک ئانی.
ل گۆری رەوانگەھێ، د ئەنجاما ئێریشان دە 7 کەس ھاتن کوشتن کو ژ ناڤا وان 3 سڤیل و 4 لەشکەر و چەکدار ھەبوون. ھەروھا دۆرا 15 کەسان ژی بریندار بوون.
دا زانین ژی، د ئێریشێ دە ئاڤاھی و ناڤەندێن لەشکەری ل دەڤەرا لێکۆلینێن زانستی ل مەسیافێ وێران بوون، ھەروھا ئاگر ب دارستانێن ل سەر رێیا مسیاف-وادی ئەل-عۆیوون و دەڤەرا حەیر عەباس کەت.
ژ دەستپێکا سالا 2024 ڤە، ئیسرایلێ 65 جاران خاکا سووریێ کریە ئارمانج و ل 140 ئارمانج، خال و بارەگەھان دانە. د ئێریشان دە 191 لەشکەر و چەکدار ھاتن کوشن و 125 ژی بریندار بوونە. ھەروھا 20 کەسێن سڤیل ھاتنە کوشتن و 36 سڤیل ژی بریندار بوونە.
