وەزیرێ پاراستنێ یێ ئیراقێ سابت عەباس گۆت، تركیێ خوەستیە ئەم مەسەلەیا په‌كه‌كێ ب شکلێ کو مە ب ئیرانێ رە کریە چارەسەر بکن.
19ێ ئادارا 2023یان د ناڤبەرا ئیران و ئیراقێ دە پەیمانەکە ئەولەهیێ هاتبوو ئیمزەکرن. ل گۆری خالەکە ڤێ پەیمانێ دڤێ پێشمەرگەیێن رۆژهلاتێ کوردستانێ ژ سینۆرێن باشوور و رۆژهلاتێ کوردستانێ وەرن دوورخستن.
ترکیە فۆرمولا ئیرانێ دخوازە
وەزیرێ پاراستنێ یێ ئیراقێ سابت عەباس د بەرنامەیەکە تەلەڤیزیۆنێ دە دیار کر کو ترکیە ژی ژ بۆ گەریلایێن په‌كه‌كێ کارەکی وها دخوازە و گۆت: مە ب تركیێ رە دیالۆگ دانیە. ئەم هەول ددن ب تركیێ رە ل هەڤ بکن دا کو گرووپێن چەکدارێن کو ل دژی وان چەکان ب کار تینن ژ سینۆر وەرن دوورخستن. تركیێ خوەستیە ئەم مەسەلەیا په‌كه‌كێ ب شکلێ کو مە ب ئیرانێ رە کریە چارەسەر بکن.
بارەگەهێن په‌كه‌كێ هاتنە گرتن
سابت عەباس دیار کر وان بارەگەهێن په‌كه‌كێ گرتنە و ل پەی چوو: بارەگەهێن په‌كه‌كێ ل گۆری بریارا دادگەهێ هاتنە گرتن و هنەک پارتی هاتنە قەدەخەکرن.
حکوومەتا ئیراقێ ژ بەر تەڤگەرا په‌كه‌كێ دلگرانە
وەزیرێ پاراستنێیێ ئیراقێ گۆت: په‌كه‌كێ تەڤگەرا خوە یا ل ئیراقێ زێدە کریە و بەردەوام کر: حکوومەتا ئیراقێ ژ بەر تەڤگەرا په‌كه‌كێ دلگرانە. هەول ددن هنەک کەسان ببن ئالیێ خوە. هایا مە ژێ هەیە کو ل ناسریە و سەماوەیێ هنەک کەسان پێوەندی ب په‌كه‌كێ رە دانیە.
شاندەیێن ترکیە و ئیراقێ 15ێ تەباخێ ل ئەنقەرەیێ گەلەک پەیمان ئیمزە کرن و ب تایبەتی گرانیا تركیێ ل سەر په‌كه‌كێ بوو.
دڤێ وەرە گۆتن کو ترکیە ب سه‌ده‌ما هەبوونا گەریلایێن په‌كه‌كێ کەتیە بەشەکە ئاخا هەرێما کوردستانێ و بارەگەهێن خوە دانینە.
مە زەخت ل تركیێ کریە کو ڤەکشە
سابت عەباس ل سەر ڤێ مژارێ ژی گۆت: مە زەخت ل تركیێ کریە کو وان هەرێمان رادەستی پێشمەرگەیان ئان هێزێن ئیراقێ بکە. رەشنڤیسا پەیمانەکێ هەیە و تركیێ گۆتیە کو ئەو ئامادەیە.
چاڤكانی: رووداو
