رۆژنامەیا “واشنگتۆن پۆست” راگھاند، حکوومەتا ئیراقێ لگەل ئامەریکا رێکەفتیە کو ھەتا سالا 2026 پرانیا لەشکەرێن خوە ڤەکشینە، لێ ھێزەکە بچووکا ئامەریکایێ ل ھەرێما کوردستانێ دمینە ژ بۆ ھەرێمێ ژ گەف و ئێریشێن کۆمێن ملیس بپارێزە.
واشنگتۆن پۆست راگھاند، ل گۆری رێکەفتنا کو ژ ئالیێ رایەدارێن ئامەریکی و ئیراقی ڤە ھاتیە گۆتووبێژکرن و ھوورگلیێن رێکەفتنێ ڤێ ھەفتەیێ ئەشکەرە بوونە، د دو سالێن بێ دە ئامەریکا دێ پرانیا ھێزێن خوە ژ ئیراقێ ڤەکشینە، لێ دێ ھێزەکە بچووک ل ھەرێما کوردستانێ بھێلە.
وەزیرێ بەرەڤانیێ یێ ئیراقێ سابت عەباسی ژی ئاشکەرە کر، بەغدا و واشنگتۆن گھیشتنە رێکەفتنەکە ریشەیی ژ بۆ بداویکرنا ئەرکێ ھێزێن ئامەریکایێ ل ئیراقێ د چارچۆڤەیا ھەڤپەیمانیا ناڤدەولەتی یا ل دژی تەرۆرێ دە، کو 10 سال بەرێ ژ بۆ شەرێ چەکدارێن داعشێ ھاتیە دامەزراندن و نێزیکی 2500 لەشکەرێن ئامەریکی ل ئیراقێ بجیھ بوونە.
ل گۆری وەزیرێ بەرەڤانیا ئیراقێ، قۆناغا یەکەم دێ ئیسال دەست پێ بکە و دێ ھەتا سالا 2025 بەردەوام بە و قۆناغا دویەم ژی دێ د سالا 2026 دە ب داوی ببە.
بەرپرسەکی پلەبلندێ ئارتێشا ئیراقێ کو نەخوەست ناڤێ وی وەرە ئەشکەرەکرن گۆت، ھێزەکە بچووک یا ئامەریکایێ دێ ل ھەرێما کوردستانێ بمینە، ژ بۆ دابینکرنا ئەولەھیێ ل ھەمبەر ئێریش و گەفێن کۆمێن ملیسێن کو ل دەڤەرێن دن یێن ئیراقێ خوەدی ھێزەکە بەرفرەھن.
ژ ئالیێ خوە ڤە، بەردەڤکێ وەزارەتا بەرەڤانیێ جەنەرال پاتریک ریدەر رەد کر کو ت داخویانیەکێ ل سەر ڤان زانیاریێن کو بەرپرسێن ئیراقی دەربارێ ڤەکشینا ھێزێن ئامەریکی ژ ئیراقێ دە، ئاشکەرە کرنە، بدە.
ئەڤ د دەمەکێ دەیە، واشنگتۆن و بەغدا ژ بۆ گوھەرتنا رۆلا ئامەریکایێ ل ئیراقێ ژ ھێزا لەشکەری بۆ پێشخستنا پێوەندیێن دیپلۆماتیک و بازرگانی، د گۆتووبێژان دە نە.
