سەرۆکێ کۆمارا ئیسلامی یا ئیرانێ د دەربارێ سەردانا خوە یا ژ بۆ ئیراق و ھەرێما کوردستانێ دە پەیامەک ب زمانێ کوردی ل سەر تۆرا جڤاکی یا X پارڤە کر و تێ دە راگەھاند، “ئەو سەردان ل سەر روانگەھا ھەڤگرتن و یەکبوونێ بوو.”
سەرۆکێ کۆمارا ئیسلامی یا ئیرانێ مەسعوود پزیشکیان شڤێدی (دوشەمبێ، 16/9/2024) ل سەر حسابا خوە یا تۆرا جڤاکی یا X پەیامەک ب زمانێ کوردی پارڤە کر و تێ دە ئاماژە دا، “د وێ سەردانێ دە 14 یاداشتێن ھەڤفێمکرنا ئالیکاریێ د ناڤبەرا ئیران و ئیراقێ دە ھاتن مۆرکرن.”
پزیشکیان د بەشەکە دنا پەیاما خوە دە گۆت، “کارێ مەیێ پێشیێ ئەوە کو ئەم بگەھن یەک زمان و یەک نەرینا ھەڤپار د ناڤبەرا ھەر دو وەلاتان دە.” ھەروەسا گۆت، “جڤینێن باش ل ئیراقێ ھاتن کرن کو بوون سەدەما زێدەتر ھەڤالینیێ د ناڤبەرا ھەر دو وەلاتان دە.”
سەرۆکێ کۆمارا ئیسلامی یا ئیرانێ مەسعوود پزیشکیان ل رۆژا 11/9/2024 گەھشت بالافرخانەیا ناڤدەولەتی یا بەغدایێ و ژ ئالیێ سەرۆکوەزیرێ ئیراقێ محەمەد شیاع سوودانی ڤە ھات پێشوازیکرن.
مەسعوود پزیشکیان ھەروەسا ل رۆژا 12/9/2024 ژی گەھشت بالافرخانەیا ناڤدەولەتی یا ھەولێرێ و ژ ئالیێ سەرۆکێ ھەرێما کوردستانێ نێچیرڤان بارزانی ھات پێشوازیکرن.
پاشی سەرۆکێ کۆمارا ئیسلامی یا ئیرانێ ل سەرۆکاتیا ھەرێما کوردستانێ ب سەرۆکێ ھەرێما کوردستانێ نێچیرڤان بارزانی و سەرۆکێ حکوومەتا ھەرێما کوردستانێ مەسروور بارزانی و ھەژمارەکە بەرپرسێن ھەرێما کوردستانێ رە جڤیا. پاشتر ب ئاوایەکی جودا ب سەرۆک بارزانی رە ژی جڤیا.
