ژنەکا سوێدی ب تۆمەتا تەڤلیبوونا د جینۆسایدا ئێزدیان دە تێ دادگەهکرن

دەستھلاتدارێن سوێدێ تۆمەتا جینۆسایدێ و شەرێ مەترسیدارێ ل دژی ژن و زارۆکێن ئێزدی ل سووریەیێ ددن پال ژنەکا سوێدی.

دەستھلاتدارێن سوێدێ ئیرۆ رۆژا پێنجشەمبێ، 19/9/2024 تۆمەتا جینۆسایدێ و شەرێ مەترسیدارێ ل دژی ژن و زارۆکێن ئێزدی ل سووریەیێ دایە پال ژنەکا سوێدی، کو ناڤێ وێ لینا لەینا ئیشاقە و ژیێ وێ 52 سالن.

دەستھلاتدارێن سوێدێ ئاماژە ژی دایە، “لینا لەینا ئیشاق” د دەما ناڤبەرا سالێن 2014 و 2016 دە ل رەقەیا پایتەختا داعشێ گەلەک تاوان دژی مرۆڤاھیێ ب تایبەتی ل دژی ژن و زارۆکێن ئێزدی کرنە.”

داخوازکەرا گشتی یا بلندا سوێدێ رینا دیڤگۆن ژی ل سەر ڤێ مژارێ د راگەھاندنەکێ دە گۆت، “ئەڤ جارا یەکێیە تاوانبارێن داعشێ کو ل دژی ئێزدیان تاوان کرنە ل سوێدێ تێن دادگەهکرن.”

ھەروەسا ل گۆر راگەھاندنەکا دن دادگەھا دادیێ یا ستۆکھۆلمێ، لینا لەینا ئیشاق د دەما ناڤبەرا سالێن 2014 و 2016 دە ل رەقەیێ گەلەک ژن و زارۆکێن ئێزدی دەستەسەر کرنە و ژ ئالیێ لەشی و دەروونی ڤە ب ئاوایەکی دژوار ئەشکەنجە دانە و مافێن وانێن دەستپێکی ل سەر بنگەھا رەوشەنبیری، ئۆلی و سێکسی زەڤت کربوون، کو ئەڤ ژی بنپێکرنا تەڤایا قانوونێن ناڤدەولەتییە.”

دادگەھا دادیێ یا ستۆکھۆلمێ بال کێشایە سەر وێ یەکێ ژی کو، ئارمانجا ڤێ تۆمەتبارێ نەھێلانا هەموو یان ژی بەشەکا ئێزدیان بوویە، وەکی بەشەکا وان ھەڤرکی و شەرێن چەکداری یێن کو د دەرحەقا وێ پێکھاتەیێ دە ھاتنە کرن.