بووبێ ئەسەر
ئالا نامووسە، ئالا وەلاتە، ئالا ئازادییە، ئالا خوەناسییە. ئالا رەمز و سەمبۆلا وەلاتەکییە. ھەر ملەتەک ھەر وەلاتەک ب ئالا خوە تێنە ناسکرن. ب نەرین و دیتنا ئالەکێ مرۆڤ دزانە کو خوەدیێ وێ ئالێ کییە ئان کینە. ژ بەر ڤێ گرینگیێ یە کو د رێبازێ دە ئالا ب خەتێن ستویر ھاتیە دەستنیشانکرن کو دڤێت کورد ل ئالا خوە خوەدی دەرکەڤن.
ئەم کورد ژی خوەدێ ئالا خوە نە و ئەڤ ئالا ھەبوونا مە د قادا ناڤنەتەوەیی دە ددە ناسین کو ئەم کوردن. ئەڤ ئالا پیرۆز ژ شۆرەشا ئاگری دە رەنگ و دەنگێ خوە وەکە ئالا کوردی گرت. د کۆمارا کوردستانێ یا ل ماھابادێ دە ئەڤ ئال وەکە ئالا دەولەتا کوردی ھاتە ناساندن و ناسکرن. ل ھەمی جھ و وارێن فەرمی و ل سەرێ چیایێن کوردستانێ، د کوچە و کۆلانێن باژار و گوندێن کوردستانێ دە ب ئاوایەکی فەرمی ھاتبوو بلندکرن.
پشتی تێکچوونا کۆمارا کوردستانێ، پێشەوا قازی محەمەد ئەڤ ئالا پیرۆز رادەستێ بارزانیێ نەمر کر کو رۆژەکێ ئەو ڤێ ب ئازادی ل سەر چیایێن کوردستانێ بلند بکە. د کوچە و کۆلانێن کوردستانا ئازاد دە بێ دالقاندن. باژار و کۆلان ب وێ بێ خەملاندن.
بارزانیێ نەمر ژی ئەڤ ئالا ئانگۆ ئەڤ ئەمانەتا پیرۆز ژ دەستێ پێشەوا قازی گرت و ئەو پاراست دا کو رۆژەکێ وێ داخوازا قازی پێک بینە. ژ وێ رۆژێ دەیە کو ئێدی ئەڤ ئالا وەکە ئالا ھەمی کوردستانیان ھاتیە و تێ قەبوولکرن.
پاراستن و ھلدانا وێ، خوەدی لێ دەرکەتاندنا وێ، بوو خالەکە سەرەکایا رێبازا پیرۆز. ژ بەر کو ئالا سەمبۆل و رەمزا وەلاتەکییە. ژ بەر کو رێڤەبرێن رێبازا پیرۆز د وێ باوەریێ دە بوون کو بێ ئالا تو نکاری ببی دەولەت. ژ بەر ڤێ بوو کو وان، ئەو پاراستن و خوەدی لێ دەرکەتن.
ژ بەر ڤێیە کو دڤێت ھەر کوردەکی ژ خوە، ژ وەلاتێ خوە حەز دکە، پێویستە کو ڤێ ئالێ وەکە رۆنیا چاڤێن خوە بپارێزە. ژ رۆژا کو بارزانیێ نەمر ئەڤ ئالا ژ دەستێ نەمر پێشەوا قازی گرت و ھەتا ئیرۆ ئەڤ ئال ل سەر دەستێ بارزانیان ھاتیە و تێ پاراستن.
دەڤاڤێتن و نەقەبوولکرنا وێ د رێبازێ دە بوویە خەتا سۆر. لۆما ژی پشتی ئازادیا باشوورێ کوردستانێ ئەڤ ئالا پیرۆز ل سەرانسەرێ کوردستانا ئازاد ھاتە دارڤەکرن، بلندکرن و قەبوول کرن کو ئەڤ ئال یا ھەمی کوردستانیانە. ب ڤێ ژی داخوازا پێشەوا قازی ئانین جھ.
ژ بەر ڤێ گرینگیا ئالایە کو داگیرکەرێن مە و کرێگرتیێن وان، ھەتا کو ژ دەستێ وان تێ دێ نەھێلن و نەخوازن کورد ڤێ ئالێ وەکە ئالا خوە بپەژرینن و قەبوول بکن. قەبوولکرنا ڤێ ئالێ تێ واتەیە کوردستانەکە سەربخوە. کوردستانەکە سەربخوە ژی نایێ حەسابێ داگیرکەر و پێگرتێن وان.
لێ ئەڤ ئالا پیرۆز ل سەر دەستێ بارزانیان وەکە ئالا ھەمی کورد و کوردستانیان ھاتیە ناسین و قەبوولکرن. قەدەغەیا ل سەر ڤێ ئالا پیرۆز ل باکورێ کوردستانێ ب ھاتنا رێزدار سەرۆک مەسعوود بارزانی یا باژارێ کەڤن دیاربەکرێ و چوونا وی یا ل ستەنبۆلێ کو ئەڤ ئالا وێ دەمێ و جارا ئەول ل بالافرگەھا ستەنبۆلێ و ل دیاربەکرێ ھاتە ھلدان.
پشتی ڤان ھەردو سەرەدانان قەدەخەیێن وەکە بەرێ ل سەر ئالا کوردی ل باکورێ کوردستانێ ھاتە راکرن. ئەو رۆژ، ئەڤ رۆژە کو ئێدی ل باکورێ کوردستانێ ئالا پیرۆز تێ ھلدان. د مەش و خوەپشاندنان دە، د جڤین و شاھیێن ل باکورێ کوردستانێ دە ئالا تێ بلندکرن ئانگۆ دارڤەکرن.
دەما کو ئەم بەحسا رێبازێ و شۆرەشێن وێ دکن ئەو ژی وەکە شۆرەشەکێ بوو کو ب ھاتنا سەرۆک بارزانی یا ترکیێ و باکورێ کوردستانێ، قەبوول بکن. قەبوول بکن کو ب ھاتنا وی ئێدی توند و تووژیا ل سەر ئالا کوردی ھاتە راکرن. ئەو سەرەدانێن سەرۆک بارزانی وەکە شۆرەشەکێ کو ل باکورێ کوردستانێ پێک ھاتبوو، ھاتە دیتن. ژ بەر کو ژ وێ رۆژێ و پێڤە ئێدی ئالا کوردستانێ ھەر چقاسی نە فەرمی ژی بە، لێ ھلدانا وێ و بکارئانینا وێ د ئاھەنگ، جڤین و شاھیێن تێنە کرنێ دە، ئالێ ژی جھێ خوە گرتیە.
ھەلبەت گەلەک شۆرەش و گوھەراندنێن مەزن ل سەر دەستێ رێبازا پیرۆز د ھەر چار پەرچێن کوردستانێ دە ھاتنە و تێنە کرن. لێ ھندەک ڤێ نابینن ئان ناخوازن ببینن کو ب سەرپرەشتیا رێبازا پیرۆز گەلەک شۆرەش ھاتنە کرن.
ژ بەر کو ئەڤ ئالا ژی دەنگ و رەنگێ کوردان و وەلاتێ وان کوردستانە. دڤێت ب چ ئاوایی نەیێ قەبوولکرن کو ھندەک کەس وێ بخن بن لنگێن خوە. مە گۆتبوو ئالا نامووسە و دڤێت ئەم وەکە کورد خوەدی ل نامووسا خوە دەرکەڤن. ئاھا رێباز ژی ڤێ دکە و ئالا پیرۆز د سەر ھەر تشتەکی خوە رە دگرن.
ئەو کەس، پارتی و تەڤگەرێن ڤێ ئالا وەکە ئالا کوردستانێ قەبوول نەکن، روومەت و قیمەتا وێ نەگرن، دڤێت مرۆڤ ژ کوردبوونا وان شک بکە. ژ بەر کو داگیرکەرێن مە چ جاران ناخوازن وێ وەکە ئالا کوردستانیان قەبوول بکن. لۆما ب قەدەخەیێن ل سەر وێ دخوازن وێ تونە بکن.
مادەم ئالا ھەبوونە دڤێت ئەم ل ھەبوونا خوە خوەدی دەرکەڤن. مادەم ئالا نامووسە دڤێت ئەم ل نامووسا خوە خوەدی دەرکەڤن. مادەم ئالا وەلاتە دڤێت ئەم خوەدی ل وەلاتێ خوە دەرکەڤن.
