ئارتێشا ئیسرایلێ رادگھینە، وان سەکرەتەرێ گشتی یێ حزبوللاھا لبنانێ حەسەن نەسروللاھ د ئێریشەکە ئاسمانی دە ل باشوورێ لبنانێ کوشت.
ئارتێشا ئیسرایلێ تەکەز کر، سەکرەتەرێ گشتی یێ حزبوللاھا لبنانێ حەسەن نەسروللاھ دوھ دانێ ئێڤارێ د ئێریشا ل سەر ناڤەندا فەرمانداریا ناڤەندی یا حزبوللاھێ ل تاخا باشوورا بەیرووتێ دە ھات کوشتن.
بەردەڤکێ ئارتێشا ئیسرایلێ ئەفیخای ئادرای ژی ل سەر پلاتفۆرما “X” راگھاند، وان فەرماندارێ ئەنیا باشوور یا حزبوللاھێ عەلی کەرکی و ھەژمارەکە ژ سەرکردەیێن دن ژی د ھەمان ئێریشان دە کوشتن.
ژ ئالیەکی دن ڤە، سەرۆکەرکانێ ئارتێشا ئیسرایلێ ھەرزی ھالەڤی د یەکەم ھەلوەستا ل سەر کوشتنا نەسروللاھ دە گۆت: “ئێریش ژ دەمەکە درێژ ڤە ھاتبوو پلانکرن و د دەما راست دە ژی ھات کرن.”
ھالەڤی تەکەز کر ژی: “ئەڤ نە تشتێ داوی یێ ل بەر دەستێ مەیە. پەیام ھێسانە: ھەر کەسێ کو گەفان ل وەلاتیێن ئیسرایل بخوە، ئەم دزانن چاوا خوە بگھینن وی.”
بەرپرسەکی ئیسرایلی دوھی گۆتبوو: “ئێریشا رۆژا ئینێ ب مەبەستا شکاندنا ھێزا حزبوللاھێ، ب رێیا کوشتنا رێبەرێن وێ یێن بلند بوو. ئەگەر ئێریش بسەر بکەڤە، ئیسرایل دێ خوە ژ ئێریشەکە بەژایی ل سەر وی وەلات دوور بخە.”
