حزبوللاھا لبنانی ب فەرمی کوشتنا سەکرەتەرێ گشتی یێ وێ پارتیێ حەسەن نەسروللاھ پشتراست کر.
حزبوللاھا لبنانی ئیرۆ 28 ئیلۆنێ ب داخویانیەکێ پشتراست کر، سەکرەتەرێ وێ حەسەن نەسروللاھ دوھی د ئێریشەکە ئیسرایلێ ل سەر تاخا باشوورێ بەیرووتێ دە ھات کوشتن.
ھەروھا حزبوللاھێ ئاماژە ب وێ کر، ئەوێ “جیھادا خوە ژ بۆ رووبرووبوونا دژمن، پشتگریا غەززە و فلستینێ، پاراستنا لبنان و گەلێ وێ” بدۆمینن.
ئیرۆ پێشتر ئارتێشا ئیسرایلێ راگھاندبوو، نەسروللاھ دوھ دانێ ئێڤارێ د ئێریشا ل سەر ناڤەندا فەرمانداریا ناڤەندی یا حزبوللاھێ ل تاخا باشوورا بەیرووتێ دە ھاتیە کوشتن.
بەردەڤکێ ئارتێشا ئیسرایلێ ئەفیخای ئادرای ژی ل سەر پلاتفۆرما “X” راگھاند، وان فەرماندارێ ئەنیا باشوورا حزبوللاھێ عەلی کەرکی و ھەژمارەکە ژ سەرکردەیێن دن ژی د ھەمان ئێریشان دە کوشتن.
ژ ئالیەکی دن ڤە، سەرۆکەرکانێ ئارتێشا ئیسرایلێ هالەڤی ل سەر کوشتنا نەسروللاھ گۆت: “ئێریش ژ دەمەکە درێژ ڤە ھاتبوو پلانکرن و د دەما راست دە ژی ھات کرن.”
ھالەڤی تەکەز کر ژی: “ئەڤ نە تشتێ داوی یێ ل بەر دەستێ مەیە. پەیام ھێسانە: ھەر کەسێ کو گەفان ل وەلاتیێن ئیسرایل بخوە، ئەم دزانن چاوا خوە بگھینن وی.”
