ئاخڤتنێن مدوورێ ئیستخباراتا سەرفەرمانداریا گشتی یێ بەرێ ئیسماعیل حەقی پەکین یا د تەلەڤیزیۆنەکە ترکیەیێ دە و ئاخافتنا وی یا ل سەر بافل تالابانی، ل سەر مەدیایا جڤاکی بوو مژارەکە بالکێش. ئیسماعیل حەقی پەکین د ئاخافتنا خوە دە پێشنیارا رێکخستنا “ئێریشا ل دژی بافل تالابانی” کر.
ئەڤ مژار ژ ئالیێ ھندەکان ڤە ل سەر مەدیایا جڤاکی ب سەرناڤێن جودا ھات بەلاڤکرن و ھەول ھات دایین کو بافل تالەبانی وەکە کوردەکی قەھرەمان کو ترکیە دخوازە وی بکوژە نیشان بدن. ل بەر چاڤان خویا دکە کو ئەفسەرەکی ئارتێشا ترک سیاسەتمەدارەکی کورد (!) تەھدیت کریە. لێبەلێ، دەما کو مرۆڤ ژ پلانێن ڤەشارتی کو ب زمانێ سیاسی ژێ رە “ئالیێ چییایێ جەمەدێ یێ نەدیتی” تێ بناڤکرن، رەوش پر جودایە.
تشتێ کو ئەم داوییێ دە ببێژن ئەم دێ سەری دە ببێژن: “دەولەتا ترک ژ بافل تالەبانی بێزار نابە.” چ جاران هەولا کوستنا بافل تالەبانی نادە.”
گەلۆ ھوون وە دفکرن کو دەولەتا ترک بارزانییان وەک کوردێن خوە و تالابانییان ژی وەک دژمنێن خوە دبینە؟ گەر ھوون وسا دفکرن، ھوون پڕ خەلەتن.
ما ھوون دفکرن کو ترکیەیا کو عەڤدللا ئۆجالان دارڤە نەکری، دێ بافل تالابانی بکوژە؟ گەر ھوون وسا دفکرن، ھوون خەلەتن.
بافل تالابانی کەسایەتەکە کو ھندەک دەردۆر دخوازن بوەرمینن و وی وەکە قەیووم ل سەر کوردێن باشوورێ بسەپینن. سەدەما ئەنجامدانا ڤێ یەکێ نە کاریزمایا بافل تالابانی، چاندا وی و ھتد. بافل تالەبانی کەسەکە کو ھەر کەس دکارە بکار بینە، دکارە ھەر کەسی ژ بۆ دەستھلاتداریا خوە بفرۆشە-بکوژە و ھەلوەستا وی یا کوردەواری تونەیە، سەرۆکەکی سەختە-تەقلید و چێکرییە. کۆلۆنیالیست و دژمنێن کوردان دخوازن ژ کوردان رە ئەحمەقەکی وەھا دەستنیشان بکن. ئەڤە پرۆژەیەکە کو ژ ئالیێ ئیرانێ و ئەنیا دژی کوردستانێ ڤە ھاتیە دەستپێکرن. لێ بەلێ ترکیە د ستراتەژیا خوەیا دەمدرێژ دە نە ل دژی وێ یەکێیە کو تالەبانی ل باشوور ببە سەرۆک. ژ بەر کو ژ بۆ کۆلۆنیالیستان مرۆڤێن وەھا بێ بنگەھ ھەر دەم ژ کاراکتەرێن ژیر بێھتر تێن تەرجیح کرن. یان ژی ئەم وسا ببێژن، ئەڤ سەرۆکێن کۆلۆنیالیستان تەعیینکری ملکێ ھەڤبەش یێ داگیرکەرانە. دەما وەختێ وێ ھات ھەر کەس دکارە وی ب کار بینە.
دەما کو کەرکووک ژ ئالیێ ئارتێشا ئیراقێ و حەشدا شەعبی ڤە د ئۆپەراسیۆنا ب فەرمانداریا قاسم سلێمانی دە ھات داگیرکرن، کەسێ کو کەرکووک فرۆتی و دەرکەت تەلەڤیزیۆنێ ژ بۆ رەواکرنا ڤێ فرۆتنێ بافل تالەبانی ب خوە بوو. ئەم بینن بیرا خوە کو ترکیە یەکەم وەلات بوو کو ژ بۆ رەواکرنا فرۆتنا کەرکووکێ جھ دا بافل تالەبانی د تەلەڤیزیۆنێن خوە دە.
ھێزێن کۆلۆنیالیستێن وەک ترکیە و ئیرانێ ھەلبەت دێ بافل تالەبانی یان ژی ڤیرژنەکا دی یا مینا وی ل ھەمبەر سیاسەتا بارزانی تەرجیح بکن. ژ بەر کو بارزانی خوەدیێ ناسنامەیەکە دیرۆکی یا خورت، کەڤنەشۆپیا بەرخوەدانێ، شیانا رێڤەبرنا دەستھلاتا نەتەوییە. خوەدی سەربۆرەکا سەرھلدێرییە.
گەر کۆلۆنیالیزم نکاربە کوردان تنە بکە، د ھوندر دە ب ھەسپێن تروادە و ب سەرۆکێن سەختە-چێکری دخوازە کوردان ژ رێیا وان دوور بخە. تەعیینکرنا سەرۆکەکی سەختە ژ بۆ کوردان ستراتەژیا بنگەھینا زھنییەتا کۆلۆنیالیزمێ یە.
کۆلۆنیالیستان ستراتەژیا سەرۆک-سەرۆکێ سەختە یا ل دژی کوردان ل باکورێ کوردستانێ جەرباندن و ب سەر کەت. ترکیێ ب سەرۆکاتیا ئۆجالان “پرسگرێکا کورد” چارەسەر!؟ کر. ژ دەستپێکا سالێن 1900 ھەتا سالا 2000 ل باکورێ کوردستانێ ھەلوەستەکە کوردستانی، سەرخوەبوونخواز ھەبوو کو ئەو 100 سال بوو نەدھاتن تەپساندن. ب ئالیکاریا ئۆجالان و پەکەکێ کورد بەر ب خەتا ترکپارێزیێ ڤە ھاتن کشاندن. یا راستی ئەڤ نە تەنێ د سالا 2000 دە بەلکو دەما کو ئۆجالان ھات ترکیەیێ دەست پێ کر. پرسگرێکا رێبەرتیا ئۆجالان پرسەک درێژە. لێ پشتی سالا 1990 دەولەتا ترک ب ھەزار و یەک رێیان ھەول دا کو ئۆجالان ببرسکینن و وەکە رێبەر پێشکێشی گەلێ کورد بکە. د دەماکو کوردان نەدکاری ل کۆلانان پەیڤەک کوردی باخڤن و دھاتن کوشتن، رۆژنامەڤانێن ترک د سالێن 1991-1992 دچوون کامپا بیقاع لگەل ئۆجالان ھەڤپەیڤین دکرن و ئەڤ ھەڤپەیڤین د تەلەڤیزییۆنێن دەولەتێ دە دھاتن وەشاندن. دەولەتێ ھەر رۆژ سلۆگانێن “ئەمێ ئۆجالان بکوژن، کوردان تنە بکن” بەرز دکرن. کۆلۆنیالیستان باوەریەک وسا ل سەر گەل فەرز کر کو ب ئاوایەکی خوەزایی دەست ب فکرینا “ئۆجالان کوردەکی ب ھێزە، دێ مە بەر ب ئازادیێ ڤە ببە، دەولەت ژ بەر ڤێ یەکێ دخوازە وی بکوژە، ئەو سەرۆکێ مەیە”، کر.
ھەرچ حکمەت بە ئۆجالان ل شامێ زەندووبەندێن خوە دھەژاندن و ب ئازادی دگەرییا. نە تەنێ ئەو، ئۆجالان و ئەندامێ ئیستخباراتا ترک د ھەمان ئیمارێ دە دژیان. ب راستی ژی د سالا 1996 دە ژی سەرۆکوەزیرێ ترک ژ بۆی ئۆجالان نامەیا ھشیاریێ شاند و گۆت کەسێن کو دخوازن تە بکوژن ھەنە. دەولەتا ترک ئۆجالان نە کوشت بەرۆڤاژی ئەو بلندکر.
د سالا 1999 دە دەما ئۆجالان ھاتیە ترکیەیێ، رۆژنامەیێن ترکیەیێ مانشەتێن وەکی “ئۆجالان تەسلیم بوو، ھەر تشتی وەک بلبلی دبێژە، پۆشمان بوو” وەشاندن. پشترە ئەڤ یەک ب دەستوەردانا دەولەتێ ھات راوەستاندن. ژ بەر کو نەخوەستن فکرا “سەرۆک ئاپۆ” د مەژیێ کوردان دە ھلوەشە. ھێژ ژی دەولەت و پەکەکە ب چێکرنا ئیماژا کو ئۆجالان د تەجریدێ دەیە دخوازن کوردان ل دۆرا ئۆجالان بجڤینن. یێن کو چیرۆکا سەرۆکاتییا ئۆجالان یا سەختە یا 40 سالی دزانن دبینن کو نھا ھەمان چیرۆک ل سەر بافل تالابانی ژی تێ نڤیساندن.
چاوا کو ئەم دزانن کو ئۆجالان “نە سەرۆکێ کوردایە” و تەنێ کەسەکە کو ژ بۆ کوردان ھاتیە تەعیینکرن، ئەم وە ژی دزانن کو دخوازن بافل تالابانی ژی بکن سەرۆکێ باشوور. دەولەتا ئیراقێ ژ وێ یەکێ نەرەحەتە کو کورد شریکێ دەولەت و سیستەمێ بن. دڤێت ئەو کوردان لاواز بکە وەکە دیڤەلانکێن شیعەیا دەولەتا کەڤنا یەک-نەتەوە، یەک ئالا ئاڤا بکە. رێیا لاوازکرنا کوردان ژی ئەوە کو کەسەکی وەکە بافل تالەبانی کو د وارێ دەروونی دە نە ئارامە، گرێدایی تریاک و ئەلکۆلێ یە و ژێدەرێ مافیایە، وەکە سەرۆکێ کوردان دەستنیشان بکن.
ژ بەر کو ب ڤی ئاوایی کورد ئێدی نابن مەترسی و دەما کو بخوازە دێ ترکیە ژی ب ھەمان ئاوایی وی ب کار بینە. وەکە مە ل ژۆر ژی دیار کری، ترکیە نە ل دژی کەسەکی وسا قەشمەر و بێ عەسلە. دەما کو ئەم ببینن کو لیستک د ناڤ لیستکێ دەیە، ئەمێ فێم بکن کو گۆتنێن ئیسماعیل حەقی پەکین یێن ل سەر بافل تالەبانی، ب راستی ژی دەما کو ھلبژارتن باشوور نێزیک بوون، تەنێ ب کێری کارێ بافل تالابانی ھات.
بەلێ، دەولەتا ترک ژی ئینکارکەرێ کوردانە و جەللادێ کوردانە. لێ ترکیە دامەزرینەرێ لیستکێیە. خەفکەک بۆ کوردا ھاتیە دانین. ژبۆ خەفک ئەکتیڤ ببە ژ ئیدەۆلۆژی، سازی و سەرۆکان تێکەلەیەک ھاتییە ئامادەکرن. رێبەرێ تەقلیدی بافل تالابانی توونکێ ڤێ خەکفێیە. ژ بلی ڤێ، ھەر وەسفەکا کو بافل تالەبانی وەک ئازادیخواز، وەلاتپارێز و سیاسەتمەدار نیشان بدە نە راستە و دەرەوە.
دەما کو ئەم د ڤێ زاوییێ دە لێبنێرن تەنێ تشتەک ھەیە کو مرۆڤ ببێژە: گۆتنێن ئیسماعیل حەقی پەکین بێواتە نە. یێن کو ل پلانێن کوور دنێرن، ڤێ یەکێ باش دزانن: “کۆلۆنیالیستێن کو ئۆجالان کریە سەرۆک، ڤێ جارێ دخوازن بافل تالابانی ژی بکن سەرۆک.” لێ مە کوردان ئەڤ چیرۆک ژبەرە.
