پشتی نێزی نیڤ سەدسالی ژ گەفکرنا ل ھەڤدو، ھندە ئیران و ئیسرایل دەست ب بژاردەیا لەشکەری دکن کو بەرسڤا ھەڤ بدن، تەنێ ئیسال ئیرانێ دو جاران ئێریش کریە سەر ئیسرایلێ. سەرۆکوەزیرێ ئیسرایلێ نەتانیاھو ژی دبێژە، “ھەر کەسەک و ئالیەکی ئێریش بکە سەر مە، ئەم دێ بەرسڤا وی بدن.”
رۆژ ب رۆژ ئالۆزیێن ناڤبەرا وان ھەر دو وەلاتان و پێشبینیا ئێریشا ئیسرایلێ بۆ سەر ئیرانێ زێدەتر دبە، ھەروەسا سەرۆکێ ئامەریکایێ ژی دبێژە، “ھوون دکارن خوە ژ سەرھلدانا شەرەکی بەرفرەھ دوور بکن.”
ئەڤ 45 سال بوون کو ئیران و ئیسرایل بەردەوام و ب ئاوایێن راستەراست و نەراستەراست گەف ل ھەڤ دکرن، لێ ھەتا نیسانا ئیسال ب ئاوایەکی ئەشکەرە ئێریشێن لەشکەری نەکربوون سەر ھەڤ. ئیرانێ ژ بۆ جارا دویێ ل 1 جۆتمەھا ئیسال نێزی ب 200 مۆشەکێن بالستی ئێریش کر سەر ئیسرایلێ. حکوومەتا ئیسرایلێ ژی گەفێن تۆلڤەکرنێ ل ئیرانێ دکە.
ل گۆر دەزگەھا کارنێگی یا ئاشتیا ناڤدەولەتی، بەرسڤا ڤێ جارێ یا ئسرایلێ دێ ژ وێ ئێریشێ توندتر بە یا کو ل مەھا نیسانێ کریە سەر سیستەمەکە رادارێ ل نێزی بنگەھەکە ئاسمانی یا ئەسفەھانێ.
وێ دەزگەھێ ئاماژە ژی دا، “پێشبینی تێ کرن کو ئیسرایل دەزگەھا ئەتۆمی یا نەتەنزێ و دەزگەھێن پەترۆلێ و جھێ چێکرنا وان مۆشەکێن بالستی بۆمبەباران بکە یێن کو ئیرانێ د ئێریشا خوەیا ل سەر ئیسرایلێ دە ب کار ئانینە.”
پشتی ئێریشا ئیرانێ، ھەژمارەکە بەرپرسێن بلندێن ئیرانێ گەفێن تۆلڤەکرنێ کرنە. ھەر یەک ژ سەرۆکوەزیرێ ئیسرایلێ بەنیامین نەتانیاھو و وەزیرێ دارایی یێ ئسرایلێ بێزالێل سمۆترچ راگەھاند، “ھەر کەسەکێ ئێریش بکە سەر مە، ئەم دێ ئێریشێ بکن سەر وی و ئیران وەکی حزبوللاھ و لبنان و حەماسێ پۆشمان دبە.”
ھەروەسا ئارتێشا ئیسرایلێ ژی ئەشکەرە کر، “ئامادەکاری ژ بۆ بەرسڤدانێ بەردەوامن و ئیران دێ باجەکە مەزن بدە.”
پشتی گەفێن حکوومەتا ئیسرایلێ، سەرۆکێ ئامەریکایێ جۆ بایدن راگەھاند، “ئیسرایلێ ماف ھەیە بەرگریێ ژ خوە بکە، لێ ئەگەر ئەم ل جھێن وان بن، ئەم ئێریشێ ناکن سەر زەڤیێن پەترۆلێ یێن ئیرانێ.” ھەروەسا تەکەز ژی کر کو ئەو دکارن خوە ژ سەرھلدانا شەرەکی بەرفرەھ ل رۆژھلاتا ناڤین دوور بکن.
