فرۆکەیێن شەری یێن ئیسرایلێ بارەگەھەکە ئارتێشا سووریەیێ ل حەمایێ و کارگەھەکە ئۆتۆمۆبیلان ل باژارێ حومسێ بۆمبەباران کرن.
ئاژانسا “سانا” یا فەرمی یا سووریەیێ ل سەر زارێ ژێدەرەکی لەشکەری بەلاڤ کر، ئیسرایلێ ئێریشێن ئاسمانی ل سەر بارەگەھەکە لەشکەری ل گوندەوارێ حەمایێ و کارگەھەکە ئۆتۆمۆبیلان ل ناڤچەیا حسیا یا حومسێ پێک ئانی.
وی ژێدەری ئاماژە ب وێ ژی کر، د ئەنجاما ئێریشێن ئیسرایلێ دە تەنێ زیانێن مادی دەرکەتنە.
ژ ئالیێ خوە ڤە رەوانگەھا سووری بۆ مافێن مرۆڤان بەلاڤ کر، فرۆکەیێن شەری یێن ئیسرایلێ ب 3 مووشەکان ئێرشی لیوایا 47 ل چیایێ مارین ل گوندەوارێ باشوورێ حەمایێ کر و ئاگر ب وێ بارەگەھێ کەت.
ل گۆری زانیاریێن رەوانگەھێ، 4 کەسێن ل کارگەھا ئۆتۆمۆبیلان یا ناڤچەیا حسیا دە، د ئەنجاما ئێریشا ئیسرایلێ دە بریندار بوون.
پێر 8 جۆتمەھێ ژی ئیسرایلێ ئاڤاھیەک ل تاخا مەزێ یا شامێ کربوو ئارمانج و د ئەنجامێ دە 9 کەس ھاتن کوشتن و ١١ کەسێن دن ژی بریندار بوون.
ل گۆری ئامارێن رەوانگەھێ، ژ دەستپێکا ئیسال ڤە ئیسرایلێ 106 جاران ناڤچەیێن جودایێن سووریەیێ کرنە ئارمانج و د ئەنجامێ دە 257 لەشکەر و چەکدار ھاتنە کوشتن و 181 لەشکەر ژی بریندار بوونە. ھەروھا 40 سڤیل ھاتنە کوشتن و 52 سڤیل ژی بریندار بوونە.
