حزبوللاھا لبنانێ ب رێیا ب دەھان مۆشەکان ئێریش کر سەر دەڤەرێن نەھاریە و ئەکایێ یێن ئیسرایلێ، ئاماژە ژی دا کو ب درۆنەکە تایبەت کاریە رادارێن ئیسرائیلێ بخاپینە.
حزبوللاھا لبنانێ ئیرۆ (دوشەمبێ، 14/10/2024) د بەیاننامەیەکێ دە راگەھاند کو، د ئۆپەراسیۆنەکێ دە ب رێیا ب دەھان مۆشەکان ئێریش کریە سەر دەڤەرێن نەھاریە و ئەکایێ ل ئیسرایلێ، ھەروەسا ب درۆنەکا تایبەت کاریە سیستەما بەرگریا ئاسمانی یا ئیسرایلێ بخاپینە و وێ ئێریشێ ئارمانجا خوە ھنگافتیە.
ھەر د وێ بەیاننامەیێ دە ھاتیە، “ھێزا ئاسمانی یا مقاوەمەیا ئیسلامی ئەڤ جارا یەکێ بوو ھندەک ژ وان درۆنێن کو بلند کرنە ب کار ئانین. وان درۆنێن تایبەت کاریە ژ مەودایێ رادارێن بەرگریا ئاسمانی یا ئیسرایلێ دەرباز ببن بێ کو بێن دەستنیشانکرن، کو پاشتر کەمپەکە مەشق و راھێنانانا لیوایا بژاردەیا جۆلانێ ل دەڤەرا بینامینەیێ ل باشوورێ باژارێ حەیفایێ بۆمبەباران کر.”
د وێ راگەھاندنێ دە ئاماژە ژی ھاتیە دان، “ئەو درۆن د وان ئۆدەیان ڤە تەقینە یێن کو ب دەھان ئەفسەر و سەربازێن ئیسرایلێ تێ دە بوون و خوە ئامادە دکر کو تەڤلی ئێریشا ل سەر لبنانێ بووبان. ئەفسەرێن پلەبلند ژی د ناڤ وان دە ھەبوون، کو ب دەھان کەس ھاتن کوشتن و بریندارکرن.”
ئەڤ د دەمەکێ دەیە کو شەڤا بۆری مەدیایا عبری راگەھاند، “ژ ئەنجامێ ئێریشەکا حزبوللاھا لبنانی بۆ سەر کەمپەکا سەربازی، سێ سەرباز ھاتن کوشتن و 67 سەربازێن دن ژی بریندار بوون، کو برینێن ھندەک ژ وان گەلەک گرانن.”
